August 19 ah Hakha Rual-U thlaan pawngah hmunhma a khuarmi SAC ralkap kah an tong, 5 an thi
The Chinland Post | 2022 August 22 – Chin ramkulh Hakha in Thantlang lei chuahnak, Rual-U thlaan pawngah hmunhma a khuarmi SAC ralkap pawl kah an tong i SAC ralkap 5 an thi tiah theih a si.
“Khua chuahnak thlaan ah hmunhma a khuarmi SAC ralkap pawl kah an tong. Mahka ah a ummi pawl hi Timit hlei sak ding in hmunhma a khuarmi phu an si” tiah CNF biachimnak nawl a ngeitu Salai Htet Ni nih Mizzima ah a chim.
August 19 zinglei sml 8:30am hrawngah Hakha-Thantlang karlak ah a ummi Timit hlei remh ṭhan ding in hlei saknak thilri pawl he himnak a lami SAC ralkap pawl a naih tein an va kah hna hi a si tiah a chim.
June 30 ah SAC riankhinhmi Chief Minister hlun Pu Ngun San Aung hruainak in Thantlang khua sersiam ṭhannak meeting an tuah hnuah SAC nih hlei remh ding in timhtuahnak an ngeih hi a si.
July 29 thok in hlei remh dingah Hakha in an i thawh i July 30 thok in SAC ralkap le Chin hriamtlai phufonh karlak ah kahdohnak a chuah hi a si.
Kahdohnak chungah SAC ralkap a tlawmbik 50 hrawng cu an thi cang lai tiah Media kip thlahmi fonh in ruahdamh a si.
Kahdohnak pawl hi CNA telh in CDF-Zophei, CDF-Hakha, CDF-Thantlang, CDF-Lautu le CJDC phufonh bawm in an tuahmi a si i mipi hriamtlai 6 fak tuk loin an i hliam tiah Salai Htet Ni nih Mizzima ah a chim.
2021 October 21 ah Hakha-Thantlang karlak ah a ummi Timit hlei cu CDF nih an rak hrawh i cu hlei cu SAC ralkap nih an hman ṭhan khawh a si ahcun SAC ralkap nih Thantlang khua ah hmunhma a khuarmi SAC ralkap pawl hriam le eidin an bawmh khawh hna lai lawng si loin Thantlang peng zong tlaih in CDF pawl dohnak caah lam ṭha a ser khawhmi a si tiah theih a si.
Cucaah Thantlang sersiam ṭhannak timi tlangtar tangin Timit hlei sersiam ṭhannak le hmunhma tlaih in CDF pawl hrawh aa zuammi a si caah kahdohnak pehzulh in a fak khomi a si.
About The Author
