Aung Lah N San Nih World Champion Pahnih A Co Cang
TCP-Online| 2018 February 24| Kawlram limpi tiah an auhmi Aung Lah N San nih Brazil champion pa Alexandre Machodo cu minutes pakhat zong a tlin hlan ah teng lak a tei caah Aung Lah N San cu world record in vawleicung champion voi hnih a co cang.
February 23 ni ah Yangon khuapi Tuhwahnah celhtual ah One Championship nih tuahmi Mixed Martial Arts (MMA) pumpak thazaang chuah in izuamcawhnak Light Heavyweight world championship ah Kawlram aiawh in aa zuammi Khachin pa Aung Lah N San nih zuamcawhtu Alexandre cu seconds 56 ah teng lak in a tei caah One Championship i Light Heavyweight ah champion a co.
“Kawlram mi hna lungrual tein rian kan tuan cun zei paoh kan tuah khawh ko” tiah Aung Lah N San nih teinak a hmuh hnu in a chim.
Tubantukin teinak a hmuh caah One Championship i MMA zuamnak tuanbia ah a pakhatnak sui taihrolh pa hnih a hmutu a si cang.
2017 kum June thla lio khan One Championship i Middleweight ah Russia rammi a tei caah sui taihrolh pakhat a rak hmu bal cang i tu a hmu he cun thla 8 chung ah sui taihrolh world champion a hmumi zong a si.
Aung Lah N San nih cun, 2018 kum canceo hrawng khin tu ka comi sui taihrolh hi humven ding in zuamnak a um than te lai tiah a chim. Cun, Heavyweight taktak cu zuam aa timh lonak kong le tu a comi pahnih tu hi midang nih an lak lonak ding tu humven peng aa timhnak kong zong a chim.
Ref:BBC
About The Author
