Avoi 10nk CACC Triennial Meeting Le Nabual Khrihfa Tlin Kum 100 Tlinnak An Tuah Lai
Salai Biak Za Cung| 2018 March 27| Avoi 10nk CACC triennial meeting cu Hakha peng Nabual khua ah March 29 in April 1 tiang an tuah lai tiah kan theih.
Hi konghe pehtlai in CACC Literature tlaitu Pastor Lai Cung nih “Avoi 10nk CACC triennial meeting cu Nabual nih an i ham i anmah khrihfa kum 100 an tlinnak he fomh kemh in tuah siseh tiah an ti. Tu kum meeting ah hin thimfung a ngei tu (delicate) hi 150 hrawng an si. Cun Ramchung ramleng in hmumkip Association an ra lai. Ramleng in pakhatnak ah LIKBK lawngtlai lei in minung 25, Bangladesh in 6, Australia in Rev. Dr Denis Suh Maung le Rev. Sai Lian Thang, USA ICBC in Thla Sui Tluang Neh le Rev. Lal Cung Awi, paletwah in 8 cun Europe lei zong in an ra phan lai nain minung zei zah ti cu fiang rih lo”.
Tu tan meeting ah hin CACC Award peknak zong a um lai . Hi Award pek mi hi kum khat voi khat tuahmi a si i tutan Award kan pek dingmi cu Pu Stephen Ni Kio a si. Ni kum ah Rev. Dr. C. Duh Kam, cun kum hmasa ah Pu Lian Uk, kum hmasa chin deuh ah Sayagyi Bawi Hu hna an si tiah kan theih.
Tu kum Triennial meeting cu CACC upa riantuantu thlennak tuah a si lai tiah kan theih. Ho vial dah thlen an si lai cu aa fiang rih lo nain CACC General Secretary Rev. Dr. Lal Uk cu a term a dih cang anih hi cu pello thlen ding a si lai.
CACC Nomination Committee nih Nominate an tuah mi hna cu GS caah Rev. Dr Za That, AGS ah Rev. Paw Luh, Literature Sectary Pastor Lai Cung Aart and Cultural Department Secretary ah Rev. Dr Khar Ling, CSSBD Development caah Pastor Ram Nawn. Cun a dang OC ah hin Chairman ah Rev. Joel Nawl Cung Lian, Vice ah Rev. Cung Hup, Treasurer ah Sayagyi L. Tluang Pum, Assistance ah Rev. Dr Za Khar an si tiah kan theih.
CACC nih tu kum ah Bible Dictionary (Lai holh) in kan chuah cang, mah hi tutan Triennial meeting ah sung lawi tein tlangzarhnak( release) kan tuah lai. Hi hi biapi ngai in tutan Triennial meeting ah chuah kan duh, tiah Pastor Lai Cung nih a biapeh ah a chim.
Hmailei CACC nih timhtuahnak (planning) an ngeihmi cu “pakhatnak ah kan Lai ca hi tangcheu in tanghra tiang Curriculum ahmang lo caah kan Lai ca cawnnak hi 2018 ah ningcang tein athar in cawn khawhnak kan chuah lai. Cozah sianginn tiang nih tangcheu in tanghra tiang cawn khawh ding in timh tuahnak kan ngei. Apahnihnak ah Sunday school cauk zong athar chuah kan tim rih. Apathum nak ah Laimi nih ngakchia nih zohawk kan ngeih bal lo mi hmanthlak zong kan chuah lai. Stephen Ni Kio khawmh mi le adang dang khawmh mi he fonh in Lai mi ngakchia caah biapi ngai in hmanthlak kan chuah lai tiah literature publish department nih a timh tuah mi si” tiah Pastor Lai Cung nih cun a chim.
CACC nih kum thum dan voi khat an tuah tawnmi Triennial Meeting cu 2015 kum lio khan Hakha khuahlun Baptist Church ah an rak tuah i tukum a voi 9nak cu Nabual khua ah hlunghlai ngai in tuah an tim ti kan theih.+++
About The Author
