Avoi 20nk HBA Triennial Civui Ah Pastor Thar 8 Le Ordination Pathum An Pek Hna
Salai Ngun San Aung| 2018 Feb. 27| Avoi 20nk Hakha Baptist Association (HBA), Triennial Civui pi cu Loklung Baptist Church ah February 22-25 kar tuah a si i hi ahhin ordination minung pathum le minung pakhat pension an pek hna i pastor thar pariat an lak hna tiah kan theih.
“Ordination pek mi, Pastor Dr. Ceu Sang Kung (Bethel Baptist Church). Pastor Chan Lian (Peniel Baptist Church) le Pastor Ram Kian (Hakha Thar Baptist Church) an si. Zokhua Area Baptist Churches in Rev. Lai Ram Hu cu pension pek a si. Pastor pek thar mi pariat cu Thawng Lian Uk, Thawng Hnin Thang, Thluai Hnem, Sung Can Zing, Dawt Chin Par, Lai Hmung, Tha Bik le Biak Za Thawng an si” HBA General Secretary Rev. Joel Nawl Cung Lian nih a chim.
HBA hruaitu thimnak le Triennial kal pi ning hi kumthum ah voikhat in a si i tukum ahhin hruaitu thimnak le phungphai zoh than nak zong an tuah tiah theih a si.
President ah Rev. Dr. Za Khar, Vice President ah Rev. Tin Hmung, GS ah Rev. Joel Nawl Cung Lian, AGS ah Rev. Stephen Soe Paing, Treasurer Pi Tawk Men, A bawmtu Pu Hrang Tling, Youth Secretary Pastor Van Tling Thang, Women Secretary Rev. Tha Sung, CE Secretary Pastor Dong Khan Cing, E&M Secretary Rev. Ceu Tling an si. Sang Ling Education Center master le Evangelist cu a hlun ning in an hmun. Hi hna vial hi 2021 tiang kumthum chung caan tling in a tuan ding an si.
Tukum HBA Triennial Civui tlangtar cu, “A hmanmi zumhnak le Thlarau mi sinak” ti a si i James 1: 18-25 le II Tim 1: 5-14 chung in lak mi a si.
“Tutan ahhin CBC GS Rev. Dr. Lawha Ling, Rev. Simon Thawng Hmung le LIKBK timi Lawngtlai lei in Rev. Dr. Lal Muan Kima le a hawile minung 4 nih an kan tel pi. Tukum cu pengtlang le khrihfabu kip aiawh zong tlamtling ngai in an kai leng ah meeting zong alhnial nak um lo tein tluang tein kan dih kho. Khrihfa lungput tak tak in kan tuah khawh timi ka hmuh tik ah kaa lawm tuk. Tlun inn a kan onhtu Loklung Tipil Khrihfabu le khuami dihlak cung zongah lunglawmhnak kan ngei i upatnak ka pek hna. HBA nih tu lio ah kan i khinh mi lak ah Siangbawi te thlan le tu kum thum chung ah timhlamhnak ngei in sak than ding mi Carson Hall hi a si. Thazang biatak tein kan chuah ko lai” tiah GS pa nih a bia peh ah a chim.
HBA ram chung dihlak 2018 chung cheuhra cheukhat a chuak mi cu 1, 725, 570, 289 (Sing thong hlei sarih, sing zahnih sing sawmnga le sing sarih fai) a si. Khual 1000 fai an chuak kho i kuzale 551 chung ah 424 meeting an kai kho. Hmaikum cu BM meeting a si lai i Immanuel Baptist Church ah a si lai. Triennial Civui cu tu hnu kum thum nak, 2021 ah Peniel Baptist Church ah a si te lai tiah kan theih.+++
About The Author
