Chin Mino Dihlak A Huap Khomi Central Chin Youth Organization (Central CYO) An Dirh Cang

TCP-Online| 2018 February 26| Chin Center for Peace and Reconciliation (CCPR) tlangtlaknak le hohatnak in Chin Youth Conference cu Kalay khuachung GBH Hotel ah February 23-25 tiang/khan an tuah i Chin ramkulh le Kawlram chung Chin Mino vialte a huap kho dingmi Central Chin Youth Organization(Central CYO) cu an dirh khawh cang ti kan theih.

Hi Conference ah hin Chin Mino bu pawl an kai kho i anmah le an umnak hmun cio i zuamcawhnak an tonmi tete ceihhmainak an ngei hna.

Center Chin Youth Organization (CCYO) sermi ah Committee OB member hna cu; President ah Salai An No Bik (Matupi), Vice President-1 Salai Thang Loon (Kanpalet), Vice President-2 Mai Ngun Men (Hakha), Secretary ah Salai Kee Hung (Mindat), Secretary-1 Salai Hau Lian Sum (Tongzang), Secretary-2 Salai Kham Len Sang (Thlado), Treasurer ah Mai Bawi Neih Sung(CYO Kalay), Treasurer I ah Dika (Hualngo) le Treasurer II Paletwa mino aiawh in Aung Soe hna an si ti kan theih.

 

CCYO Upa Thimi Hna

Salai An No Bik nih “kan nih cu a bikin khua le ram cio i thingram kong, ni sunglawi puai caan ah daite in kan hman khawh i humhim tein kan um khawh cio naklai kan si khawh tawk in kan umnak hmun le ram cio ah tuah ding hi a si ko.

Tutan Central Chin Youth Organization dirhmi kongah mi cheukhat nih Chin Mino zong a huap i Conference phun a si lo ti an soi hna.

Hi kong ah Vice President i thimmi Kanpalet mino Salai Thang Loon nih “Chin Mino tiah a huap kho lo ti a chimtu pawl khi cu zeibantuk bu a va um zongah a huap kho mi a si ti a pom balmi an si lo. Tutan i kan dirhmi hi cu ramchung Chin Mino zate a kan huap khawh dingmi Mino bu a si” tiah a chim.

Secretary Salai Kee Hung nih “A ngai ti ko cun kan nih Chinmi ah hin zei bu paoh hei dirh ko hmanh sehlaw Chin zapi a huap kho tak ding bu dirh ding cu a fawi lo. Chin Mino hin Organization, Fellowship le Network ti phun hna a tam tuk ca zong hin a si. A biapimi cu kan zapi lungrual in rian kan tuan khawhnak tu hi a biapi” tiah a chim.

Tutan ah dirh tharmi Central Chin Youth Organization nih a bikin riantuan aa timhmi cu; peng kip le khua kip hna ah a cangmi rithaisii buainak kong, pawngkam thingram zohkhennak kong, Chin Mino hna Network ser piak, ngandamnak, lentecelhnak le peng le tlang cio hna a humhim khawhnak ding ca a bikin riantuan an tim hna.

Tutan Chin Center for Peace and Reconciliation (CCPR) tlangtlaknak le hohatnak in tuahmi Chin Youth Conference ah hin Chin ramkulh chung i siangngakchia le peng tlangkip i mino bu 19 in Chin Mino minung 70 leng an kai kho ti kan theih.

Ref:Chin World

Na ruahning rak langhter ve.. (Leave a comment)

%d bloggers like this: