Avoi 4nak WPC Paih Ah Tial Cung Thang Le Tial Uk World Champion An I Cuh Lai

0

Tawk Tling Thang| 2019 June 13| Aralaimi July 13, Indianapolis ah tuah dingmi avoi 4nak World Paih Championship (WPC) paih zuamnak ah Middle weight level in Salai Tial Cung Thang le Tial Uk cu World Champion an i cuh lai tiah kan theih.

Hi kong he pehtlai in WPC in haotu Pu Ang Cung nih, “Middle Weight level in Salai Tial Cung Thang le Tial Uk cu dengteo (direct) bak in a ralaimi WPC paih zuamnak ah ‘Middle Weight World Champion’ an i cuh lai. Tuan deuh ahkhan Tial Uk nih champion a co i amah he aa pai dingtu a hngak. Hnu deuh ah Tial Cung Thang  nih middle weight champion a co ve caah atu bantuk in Tial Uk he an i paih lai ding cu a si. Hihi WPC nih kan kalpmi zulhphung a si. Anmah pahnih an i paih dingmi tlangtar (title) hi minung 16 an i paih dingmi middle weight paih he aa khat lo. World Champion cotu laksawng hi $7000 a si i a sungmi laksawng hi $2000 a si ve lai” tiah The Chinland Post ah a chim.

“Tutan WPC paih ah Naga champion le a changtu telh in minung 5 kan sawm hna. Hmaizarh khi visa an lut cang lai. Cu lawng si lo in Chin Miphun Ni ah ramkip in champion cotu pawl zong kan sawm dih hna. Vanlawng ticket man hnarcheu kan liampiak hna lai. Tutan paih ah MMA-One Championship taisawm cotu Aung La Nsang zong rat aa tim. Salai Tial Cung Thang a rak zul lai” tiah a biapeh ah a chimchih.

Middle weight aa pai ding ah Newzealand in Ram Hei (Hakha Khuahlun a si,  minung 8 nih an zulh  lai), Heavy weight aa pai ding ah Sweden in Sang Bik Hmung (Phai khua), Middle weight aa pai ding ah Denmark in Ro Sang Bik (Khuabung khua) le Heavy weight aa pai ding ah Van Ceu Lian, Middle Weight aa pai ding ah Canada in Cia Khar (Hakha Khuahlun_anih hi cahmi a si lo caah amahte in vanlawng ticket aa liam lai). A dang hi cu cahmi lawngte an si. Vanlawng ticket man WPC nih hnarcheu an liampiak hna lai tiah WPC haotu sin in kan theih.

Perth Western, Australia ah Hakha Khuahlun in Lai Ram Ceu nih zatlang le zuamcawh kemh in champion a co. Western Melbourne, Australia ram ah Thantlang peng, Hmawngtlang khuami Chan Cung Lian nih zatlang le zuamcawh he bual a co. Dallas ah Uk Ling Thang nih bual a co tiah kan theih.

“Lai pathawng Rung Lian Ceu cu anmah Naga ram paih zuamnak ah anmah paih zulhphung ning cun a sung, pathumnak tiang lawng a ngah. Asinain, aa paihmi zoh tikah thal thlak in cun an tei lo. Tutan cu kanmah Lai paih zulhphung ningte bak in an i paih lai caah zeitluk in dik zoh an nuamh te hnga, khuaruahhar khi a si ko lai. Naga kan unau paih thawng hi pound 160 cung an si caah annih cu heavy weight ah an i pai te lai” tiah Pu Ang Cung nih a biapeh ah a chimchap.

2017 Tho Paih- zuamcawh final ah Tial Cung Thang le Tial Uk an i paihnak video.

 

Pound 160 tang a simi Middle Weight caah aa pai ding minung 16 tiang an cohlan. Champion laksawng cu $5000 le a pahnihnak laksawng hi $2000 a si lai. Cu bantuk in Heavy weight caah aa pai ding minung 32 tiang an cohlan i champion laksawng cu $8000 le champion taisawm pek a si lai.

Middle Weight ah special in World Champion cuhnak program zong a um chih lai i MMA-One Championship ah World Champion taisawm a cotu Aung La Nsang zong nih a telpi hna lai tiah kan theih.

About The Author

Na ruahning rak langhter ve.. (Leave a comment)

%d bloggers like this: