Rungrul Nih Thantlang Peng Khua Cheukhat Kawmhmun Ekah 200 Renglo A Eipiak Hna
Salai Elvis| 2019 June 13| 2019 April thla dih in June thla canceo a tuni tiang ah Thantlang khuachung sangthen pathum telh in khuate 14 ah rungrul nih lo tuah mi kawmhmun buaktlak in Ekah 242.42 renglo a hrawhpiak cang hna tiah cinthlaknak zung tuanvo ngeitu sin in kan theih.
Thantlang khuachung sangthen pathum dumlo tuah mi, Khuahrang, Lungler, Tlangpi, Tlangte, Tikhuangtum, Surngen, Thlualam, Vanzang, Hmawngtlang, Leitak (A+B, Zipi) tiin khua 14 ah rungrul nih a ei in a hrawhpiak hna hi a si. Hi chungah ekah tambik a hrawhpiak mi hna khua cu Khuahrang a si i Ekah 80.00, pahnihnak ah Surngen ekah 35.50 tluk a rawk.
“Kum dang ah cun a ei, ka thei tuk lo, tukum cu khuaruahhar le lungrawk bak a si ko. Ei tling bar tling zong an chuak kho ti lai lo, Kawm kung a zim no bak in a ei dih ko. Zeiti tuah awk zong kan thei hna lo” tiah lo ngeitu nutung pakhat nih TCP ah a chim.
“Dum le lo kawm an cinmi rungrul nih a eipiak mi hna cu kan zung ah thawngthanhnak an rak tuah. Kanmah lei nih a ei lonak ding le a tangmi kawm kung runvennak kong le rungrul a thah ning cang kong kan chimh hna. Cun thladih khuate khuabawi meeting zongah kan chimh hna. An dum lo a rawkmi le a eipiak mi hna zong cunglei ah an min le an eipiak mi zat ekah ning tein kan kuat hna. Bawmhnak a um lai maw, zeitindah an bawmh hna lai timi cu kan theih lo” tiah Thantlang peng cinthlaknak zung tuanvo ngeitu Pa Piang nih TCP ah a chim.
Rungrul thahning cang le hmanrua hna: thakbare (hmathak), Aithing, Sapia dip le Sahdah (se-yout-kyi) hna cu phawmh hnu ah ti tlawmpal in cawh i a hang khan rungrul thah ding a si. Chemical(cozah nih tuah mi sii) hman lo in kokek sii deuh hman deuh ding kong a cunglei upa nih a chim.
Kawm ei mi rungrul hna cu Palep nih fa a hrin mi (Fall Army Worm) rungrul phun pawl an si. Hi rungrul cu 2016 kum ah nitlak lei America ram in a rak i thok mi a si i Africa ram, 2018 kum ah India ram, nai te ah Kawlram chung Sagaing ramthen tiang an rak phan. Laitlang zong a tukum in India ram le Sagaing ram in a ra mi nih a rak phak ve hna hi a si. Mah Palep cu zankhat chungah meng (khaan) 60 a zuang kho mi a si i mah rungrul cu cinthlak mi thil phun 86 a hrawk kho tu zong a si tiah theih a si.
Photo: The Chinland Post
About The Author
