Bo Nagar Hruai Mi MRDA Telh In Sagaing, Magwe, Mandalay Dohthlennak Phu Fonh Nih Burma National Revulutionary Army- MNRA An Dirh
Salai Mangpau | September 9, 2023 — Pale peng dohthlennak phu Bo Nagar hruai mi Myanmar Royal Dragon Army (MRDA) telh in Sagaing, Magwe, le Mandalay ah dohthlennak a tuah mi bu pawl fonh in Burma National Revolutionary Army (BNRA) cu September 9 ah dirh a si tiah BNRA nih cathanhnak a chuah.
BNRA phu cu MRDA bu a ṭhawnnak ding in dirh mi phu a si caah BNRA phu dirh a si hnu ah MRDA bu cu hrawh a si cang lai tiah MRDA thawngzamhnak lei ṭuanvo ngeitu nih a chim.
“MRDA bu hrawh a si cang lai, BNRA phu cu miphun kip fonh in dirh mi a si. Hruaitu lutlai bik ah Bo Nagar ṭuanvo pek a si ṭhan ko tiah MRDA thawngzamhnak lei ṭuanvo ngei tu nih a chim.
BNRA phu aa tinh mi cu thawngthanh a si ṭhan te lai tiah theih a si.
“BNRA phu ah MRDA bu telh in Sagaing, Magwe, Mandalay ramṭhen chung a ummi dohthlennak a tuah mi bu lian, bu hme, vialte fonh in thazang ṭhawn nakhnga tiah timh in dirh mi phu si i, NUG nih dohthlennak kong timhtuah mi kong ah dirpi le thazang fonh in dirh mi phu pakhat a si ko” tiah BNRA lei nih an chim.
BNRA nih timhmi 4 chung ah, thleidannak um lo mi Federal Democracy ramthar ser khawh nak le nawlngeihnak hman in ram uknak a latu hna an caan dih/dongh ter ding, NUG telh in ramchung dohthlennak a tuah mi bu hna le tlangcung hriamtlai dohthlennak bu he tangrual in le hmukhat ah kahdohnak tuah ṭi ding hi an timh mi a si.
About The Author
