Boarder Sawng Sayaci Nih A Siangngakchia Kum 13 Nu A Tlaihhrem
Aung Aung| 2017 February 17| Sagaing ramthen, Kalaymyo peng Pinkhunggyi khua ah a um mi Model Class Boarder sawng sayaci Thawng Aa nih a siangngakchia kum (13) cu February 10 ah khan a tlaihhrem tiah theih a si.
Tlaihhrem a tongmi nu a chungkhat pa nih, “kan tu nu te hi tang sarih lawng a kai rih. Kum (13) hmanh a tling set rih lo. Zan sml. 8 hrawng a hawi le pathum he a sawng in an tin lei ah an Sayagyi pa nih a zulh hna i keimah nih kan thlah lai, ei awk zong kan cawk piak lai tiah a ti i a auh hna. An zul lo, cuti an zulh duh lo tikah a kut in a dawh in kan tu nu te cu cycle in a kalpi. A umnak inn hmai an phak tikah a cycle rang deuh in a mongh i hmundang ah a kalpi” tiah a chim.
“February (10) zan ah a hawile nih cun an rak kan chim i kan kawl collh. Cu zan ah cun an sayagyi pa cu a zaam i nihin tiang cu khua ah a mui kan hmu rih lo. February (11) ah khan Sayagyi pa nu le pa nih tangka sing 100 in an rak kan rem” tiah a chim chap.
Tlaihhrem a tongmi nu te hi a nu le pa cu ramdang ah kuli rian an tuan caah a pi le pu sin ah a um mi a si.
Tlaihhremnak a hmuh an i rem mi kong he pehtlaih in sihni U No Hmung nih, “Yazartatgyi Pohmah (376) ninng in nun chung thong maw kum (10) thong pakhat khat paoh thlak khawh a si. I remnak nawl zong upadi nih a onh lo. Palek nih an tawlrel ding mi a hmuh a si. Biaknak leikap in ngaihthiam khawh cu a tha ko. Asinain Cozah upadi tu cu zulh a herh. Cuti a silo ahcun upadi hman a tlaih nak a um lai lo. A chimrel kho paoh nih an duhmi pah an tuan cang lai cu ta” tiah a chim.
Sagaing ramthen chung ahhin 2016 kum khat chung lawng ah kum tling lo ngakchia tlaihhrem a hmuh hi 64 a um. 2017 ah a hmuh 75 a um hoi i kum 16 a tling cang mi nu tlaihhrem a hmuh hi 26 ah 46 le 2017 ah 65 tiang a karh. Ramkomh Myanmar ah 2017 ahhin tlaihhrem a tambik lei pariat nak a si tiah Ministry of Home Affairs cazin ning in kan theih.
Ref: Chin World
About The Author
