Democracy Thanchonak Caah Ramkhel Riantuantu Paoh Nih Media He I Ton Peng A Herh; Chinram A Tlawngmi US Palai

City Hunter| 2018 February 15| Myanmar ram, US taanzung (embassy) in lutlai bik changtu George N. Sibley nih February 15 chun, The Chinland Post zung ah Chin media cheukhat he ton biaruahnak ngeih lio ah ramkhel riantuantu paoh nih democracy thanchonak caah media he i ton lengmang a herhnak kong a chim.

โ€œRamrian tuannak le ram thlenremhnak rian tuannak ah ramkhel riantuantu paoh nih media (journalist) he i ton lengmang a herh. Media hi hrial awk an si lo. Media hi mizapi mitkhua autertu le khuahmuhtertu a si bantuk in mizapi thimmi ramkhel riantuantu paoh nih media hi hrial awk le pehtlaih lo awk a tha lomi a si. Democracy thanchonak ding ah media hi a biapi tukmi tawhfung pakhat bantuk a si ve. Media zalonnak a um i ramkhel riantuantu nih media hmanzia a thiam ahcun democracy ukhruainak a thanchoter lai i ram a thangcho lai. Cucaah, Myanmar ram le Chinram nih media zalonnak le ramkhel riantuantu hna nih media he i pehtlaih thiam hi a biapi tukโ€ tiah Myanmar ram US taanzung in lutlai changtu George N. Sibley nih a ti.

Atu bantuk in Myanmar ram, US taanzung in lutlai bik changtu George N. Sibley nih bia a chim hi February 15, The Chinland Post zung ah Chin media cheukhat he ton biaruahnak ngeih lio ah a si.

The Chinland Post in Editor In Charge Salai Ngun San Aung nih Chin Media kong chimhfiannak a ngeihmi ah Chin media nih nihin tiang Chin ramkulh Chief Minister kan ton khawh lonak kong a chimmi cung ah US palai nih hi bia a chim cu a si.

US palai nihcun tu zanlei Chief Minister he ton biaruahnak kan ngeih tikah hiti ton biaruahnak nan ngeih khawh lonak kong cu ka hal te lai tiah a ti.

NLD cozah thar a kai hnu in Chin media nih Chief Minister voikhat hmanh ton biaruahnak kan ngei kho rih lo. Cu pin ah Chin ramkulh hluttaw tonpumhnak ah Chin media pawl zalongte in thawnglaknak nawl an pe bal rih hna lo tiah theih a si.

February 16 ahkhan Hakha in Yangon lei ah a kir than cang tiah kan theih. +++

Na ruahning rak langhter ve.. (Leave a comment)

%d bloggers like this: