Buthidaung le Maungdaw Peng Um SAC Ralkap Sakhaan Pawl AA Nih An Kah Hna, A Zaam Mi Ralkap Pawl An Kah Hna I 33 An Thi
The Chinland Post | 2024 March 25 – Rakhine ram, Buthidaung le Maungdaw peng um SAC ralkap sakhaan pawl AA nih an lak khawh nakhnga kahdohnak an tuah thluahmah i sakhaan in a zaam mi ralkap pawl an dawi hna i an kah chap hna caah ralkap 33 an thi tiah AA nih thawng an thanh.
Maungdaw khua, Cing-chaung BGF sakhaan cu AA nih an kulh hna i an kahnak hna i thla 1 deng a rau cang i cu Cing-chuang sakhaan tlamtling tein an lak khawh nakhnga atulio hi fak ngaingai in an kah lio a si i kahdohnak an fahter hnu ni 2 chung ah Cing-chaung sakhaan cu cheukhat an lak cang tiah theih a si.
Maungdaw um Cing-chaung sakhaan an kah chung ah Cing-chaung a hnulei um Yan-aung-min sakhaan cu 2024 March 23 ah tlamtling tein an lak khawh cang i ralkap ruak, kahdohnak thilri le kuanzen pawl cheukhat an lak khawh tiah theih a si.
Cubantuk in Maungdaw khua, Ta-man-ta sakhaan zong AA nih kah hram an thawk i sakhaan chung in a zaam mi SAC ralkap an dawi hna i an kah hna caah ralkap ruak 20 leng le hriam, kuanzen pawl an lak chap tiah theih a si.
Cubantuk in February 24 thawk in an kah mi Buthidaung hrambunh, IB 552 zong an kah thluahmah i sakhaan a ning in an lak khawh nakhnga an i zuam tiah theih a si.
About The Author
