June 17, 2024

Buthidaung Um IB 552 Kan Lak Cang Tiah AA Nih A Thanh

0

The Chinland Post | 2024 March 27 — Rakhine ram, Buthidaung hrambunh SAC IB 552 cu March 25 ah tlamtling tein kan lak khawh cang tiah AA nih March 26 ah thawng a thanh.

Buthidaung hrambunh MOC 15 kuttang IB 552 cu a luancia February 24 ah kah hram an thawk i SAC lei nih vawlei lei le van lei he fak ngai in kahdohnak a tuah caah thla 1 leng a rauh hnu ah sakhaan a ning in an lak khawh hi a si tiah cathanh ah an ṭial.

Sakhaan lak kahdohnak chung ah SAC lei hriam, kuanzen, ruak le hriam chiah in a sungpe mi ralkap cheukhat le a zaam mi ralkap pawl zong an dawi hna i an tlaih hna tiah an chim.

Hriam chiah in a sungpe mi ralkap le an chungkhar minung thong tampi cu Paletwa ah ṭha tein kan zohkhenh hna tiah an ṭial.

Myanmar-Bangladesh ramri, Rakhine ram, Maungdaw peng, Ta-man-tha khuakomh nichuah lei Rakhine khua pawng ah SAC ralkap 90 hrawng nih March 25 ah hriam chiah in a sung an pek tiah AA nih cathanh ah a langhter.

Rakhine ram kahdohnak thla 4 chung ah Mrauk U, Kyaukdaw, Minbya, Mebon, Ponnakyun, Paukdaw, Ramree le Chin ramkulh Paletwa khua hna cu AA nih a lak dih cang.

About The Author

Na ruahning rak langhter ve.. (Leave a comment)