June 21, 2024

Caan Karlak Thimnak Ah Kanpetlet Le Matupi Peng In MP Thutdan Pahnih A Lawngmi An I Zuamcuh Lai

0

chin state hluttaw

City Hunter| 2018 May 9| Myanmar rampi MP thutdan a lawngmi hmun 13 zuamcuhnak ding caan karlaknak thimnak cu aralaimi November 3 ah tuahding in ramkomh thimnak commission zung nih May 8 ah an thanh. A lawngmi MP thutdan 13 chung ah Chin ramkulh, Kanpetlet le Matupi peng in MP thutdan pahnih aa tel tiah kan theih.

Caan karlak thimnak tuahding MP thutdan a lawngmi cu; Pyithu hluttaw in thutdan 4, Amyothar hluttaw in thutdan 1, ramkulh le ramthen hluttaw in thutdan 8, a zapi MP thutdan 13 a si. Hi chung ah Chin ramkulh in a lawngmi MP thutdan pahnih cu; Kanpetlet peng in Pyithu hluttaw MP thutdan pakhat le Matupi peng in ramkulh hluttaw MP thutdan pakhat an si.

Chin ramkulh in MP thutdan pahnih a lawnnak a ruang cu thihlohnak ruang ah a si. MP rian an tuan cuahmah lio ah a thimi cu; Matupi peng in ramkulh hluttaw palai MP Pu Hung Kheng le Kanpetlet peng in Pyithu hluttaw palai MP Pu San Khin an si.

“2015 thimnak tuah lio ah Kanpetlet peng in thimnak a rak i cuhtu party pali an si. Cu hna cu; NLD, CNDP, CLD le USDP an si. 2015 kum thimnak tuah lio Kanpetlet peng Pyithu hluttaw thimfung hmunhma ah mee thla khotu zapi hi 11484 an si. Cu bantuk in Matupi peng in thimnak aa cuhmi party cu; NLD, CNDP, CLD, USDP le NUP an si. Ramkulh hluttaw thimfung hmunhma No.1 ah mee thla khotu zapi hi 16445 an rak si. Tukum ah a thar in chungkhar cazin kan laak dih than cang hna. Nikum nakin mee thla khotu an tam deuh cang lai” tiah Chin ramkulh Thimnak Commission zung in Director U Lin Kyaw nih The Chinland Post ah a chim.

Zeitik caan ah dah MP aa cuh ding min cazin chuahpi le zei party dah thimnak aa cuh lai timi le zeitik in dah thimfung lemsoinak tuah khawh a si lai tibantuk pawl cu ramkomh thimnak commission lei nih zeihmanh thanhnak an tuah rih lo caah aa fiang rih lo tiah kan theih.

A ralaimi caan karlak thimnak tuah dingmi ramkulh le ramthen in MP thutdan a lawnnak hmunhma hna cu; Chin ramkulh, Pego ramthen, Mandalay ramthen, Sagaing ramthen, Magwe ramthen, Shan ramkulh le Rakhine ramkulh ah an si.

Chin ramkulh ah MP thutdan 39 a um. Hi chung in 2015 kum thimnak tuah lio ah party kip in MP thutdan an hmuhzat cu; NLD nih MP thutan 28, ZCD nih MP thutdan 6 le USDP nih MP thutdan 5 an hmuh.

2010 thimnak tuah lio ah CNP (atu CNDP) nih MP thutdan 10 le CPP nih MP thutdan 11 le USDP nih MP thutdan 18 an rak ngah. Asinain 2015 thimnak ah cun a thar dirhmi CLD telh in aho Chin Party hmanh nih MP thutdan pakhat hmanh an ngah lo.

About The Author

Na ruahning rak langhter ve.. (Leave a comment)