CACC Nih ‘Lai Book of The Year Award 2019’ A Tuah Lai

Salai Elvis| 2019 July 22| Chin Association for Christian Communication (CACC) nih 2019 kum January in December thla tiang kumkhat chung Lai ca in chuahmi chungah a thabik timi ‘Lai Book of The Year Award 2019’ laksawng peknak a tuah lai tiah kan theih.

2018 chung ah Laica in cauk a chuakmi lakah a tha bik thimnak le laksawng peknak tuah a si cangnak kong, cu chungah ramleng lei chuahmi cauk tiang huap khawh lo pin ah le hmuh khawh dih a si lo caah  2019 (tukum) cu Laimi vialte cauk chuahmi chungin zoh khawh kan i zuam lai, cucaah nan umnak ram cio in siseh, nan chuahmi cauk vialte Hard Copy nan rak chuahpi cionak lai kan in sawm hna tiah CACC nih thawngthanhnak a tuah.

Kan sin ah a phan lomi cauk cu zohfel khawh a si lai lo caah thim lo tikah CACC mawhphorh lo ding kong, Cauk a chuahmi vialte nih CACC cauk dawr ah zuarpiak khawh a sinak kong zong a thanh chih.

“A biapi ngaimi hi bantuk in Laimi nih kan tuah bal lo mi, Laimi chung in Catialtu hna thazaang peknak le kan in lomhpi hna, thazaang kan in pek ko hna hih! Ti saduhthahnak le Mino tampi nih Cauk tam piin tial hna seh law chuah hna seh, Cauk a chuak mi chungin sunhlawih theng lomi zong kan in sunhlawih pi  ko hna ti saduhthahnak he a tubantuk in kan tuah hi a si” tiah CACC Literature and Publication Department Secretary Pastor Lai Cung  nih TCP ah a chim.

Hi Award peknak cu 2020 kum Kalaymyo CBA tuah dingmi CACC BM, Meeting March thla dongh lei pek an si te lai.

“Cauk an chuahpi mi chungin a thabik timi Uk khat lawng Committee nih thim a si te lai, laksawng cu Roca le tangka a si lai i, tangka fang tu cu zeizat a si lai biakhiahnak tuah a si rih lo. Hi Award peknak cu hmaikum zong ah pehzulh in tuah kan i tim” tiah a cunglei upa nih a chimchap.

Lai cauk thabik tiah rikhiahmi le an tumtah ning cu; kum khatchung January 1 -December 31 kar a chuakmi a si lai, Cauk hrilhfiah: Non Periodicals) le Commercials, Fakthanh aa tel lai lo, cahmai 49 cung a si lai, Lehmi cauk aa tel lai lo, Cauk phunthen lo in zapi nih an uar bik mi le a tha bik mi cauk a si lai, Catial tu nih  a mah cauk thimfung a thla kho lai lo, Uk 10 in a cunglei nam mi a si lai.

Atu bantuk in 2018  ‘Lai Book of The Year Award’ laksawng cu Salai Ni Peng Ling nih tial mi ‘Hlawhtlinnak le Thinlungput’ timi cauk nih a hmuh tiah kan theih.

Na ruahning rak langhter ve.. (Leave a comment)

%d bloggers like this: