CACC Nih Scholarship Phunli In Minung 25 Renglo Bawmhnak An Pek Hna Lai
Tawk Tling Thang| 2019 July 9| CACC (Chin Association for Christian Communication) tawrelnak in tuahmi cathiam bawmhnak education scholarship phunli cu tukum 2019 kum zong ah pehzulh in bawmhnak an pek than hna lai tiah kan theih.
Hi kong he pehtlai in CACC- Development Department Secretary Pastor Ram Nawn nih, “Tukum zong kumdang bantuk in CACC tawlrelnak in fimcawnnak kong ah scholarship phunli in bawmhnak pek than an si lai. Form zong kan zuar i atu cu kan phih cang. Minung 50 hrawng nih an sok, atu hi kan chekpiak cuahmah lio hna a si. A rauh hlan ah meeting kan tuah lai i committee nih scholarship pek dingmi thim le fehter an si lai. Cun, scholarship petu hna nih an pek khawhmi minung zat leng in CACC nih chap an si le si lo zong kan ceihchih te lai. Hi scholarship cu kumkhat ca lawng in pek an si, a ngah ciami zong nih sok than khawh a si” tiah The Chinland Post ah a chim.
Hi scholarship phunthum cu Secular program a kaimi lawng nih sok khawh asi, biaknak lei cu sokkhawh a si lo tiah kan theih. Scholarship phunli cu a tanglei hna hi an si.
- Van Kulh Foundation
Ramkomh Kawlram (Union of Myanmar) ramchung ah MBBS le Master in acunglei cawnnak a ngei liomi paoh nih sok khawh asi. Minung pakhat ah Ks. 200,000 cio in minung 10 pek asi lai.
- Tial Lian le Hniang Tum Scholarship
Ramkomh Kawlram (Union of Myanmar) chungah Master in a cunglei cawnnak a ngei liomi paoh nih sok khawh asi. Minung pakhat ah Ks. 300,000 in minung 3 pek an si lai.
- CACC-CMC, Korea Scholarship
Ramkomh Kawlram (Union of Myanmar) chungah Bachelor Program pakhat a kai liomi paoh nih sok khawh asi. Minung pakhat ah Ks. 150,000 in minung 10 pek an si lai.
- Rachel Kim Foundation
Hi schorship cu Korea ummi Rachel Kim Foundation nih pekmi a si. Kumkhat ah minung pahnih, minung pakhat ah ks. 200,000 pekmi scholarship a si. Hi program cu 2018 kum in thawkmi a si. CACC nih minung pahnih an chappiak i 2018 kum ah minung pali an pek hna.
Hi education scholarship cu biaknak lei si lo mi secular program a kaimi hna lawng nih sok khawh a si.Cun minung pakhat nih phun thum chungah pakhat lawng sok khawh asi.
CACC in AGS – Rev. Paw Luh nih, “Vankulh foundation scholarship hi 2009 in kan thawk. 2009 in 2017 kum tiang ah 88 kan pek cang hna. Rev. Tial Lian le Hniang Tum Scholarship hi 2016 in kan thawk 2016 le 2017 kum ah a zapi minung 4 kan pek cang hna. CACC-CMC, Korea Scholarshiphi 2016 kum in kan thawk. 2016 kum le 2017 kum ah an zapi minung 21 kan pek cang hna” tiah The Chinland Post ah a rak chim.
About The Author
