Pu No Than Kap; CNLD Kan Tlaihtleng Cu Tlukrualnak Le A Dikfelmi Federal A Si

????????????????????????????????????

Tawk Tling Thang| 2019 July 9| Chin National League for Democracy (CNLD) party nih an i tinhmi tlaihtleng cu panglong biahren hnatlaknak lungput ning in tlukrualnak le a dikfelmi federal hmuh khawhnak hi a si tiah CNLD party upa pakhat sin in kan theih.

Hi kong he pehtlai in CNLD Vice Chairman Pu No Than Kap nih, “CNLD party nih kan i tinhmi tlaihtleng cu panglong biahren hnatlaknak tuahmi lungput ning in miphun tlukrualnak le tlangcungmi nih kan duhmi le kan khelmi a dikfelmi federal mumal in i uk khawhnak ding hi a si. Cucaah, aralaimi thimnak caah CNLD nih hluttaw palai aa cuhtu ding (candidates) min chuahpi tik zong ah Uknak, Biaceihnak le Upadi phungsernak kongkau he aa pehtlai in fimnak le thiamnak a ngeimi kha a biapi in pengkip party upa hna nih an thim cio hna a herh lai” tiah The Chinland Post ah a chim.

“Nihin kan ram ah miphun hrambunh in ramkulh 7 a dir cia cang. Burma miphun hi ramthen 7 in an dir tikah miphun tlukrualnak a um ti lo. Tahchunhnak ah miphun 7 (ramkulh 7) nih Amyotha hluttaw palai 12 cio lawng  kan ngeih lio ah Kawl miphun pakhat lawng a simi nih palai 84 a ngeih ve hna tikah tlukrualnak a um kho ti lo. Hiti tlukrualnak a um khawhnak ding ah Kawl miphun hi state pakhat asiloah tlangcung miphun he aa tlukruang te in palai chiah ve a herh. Cun, state ah siseh, ramkomh ah siseh, uknak, upadi phungsernak le biaceihnak a simi suttung pathum zong hi cuai i ler lo in aa tlukrualmi nawlngeihnak a um cio ding zong hi Chin party nih kan khelmi cu a si”.

Pu No Than Kap nih, “Atu hi party register kan ngah rih lo. Asinain, July 10 hi meeting tuah an timh caah thaizing (July 10) ah register hi an kan pek lai ti kan zumh. Register kan ngah ahcun a ralaimi thimnak ahhin Chin ramkulh pengkip thimfung hmunhma zapi, cun Chin Affair Minister caah Sagaing ramthen, Magwe ramthen le Yakhine ramkulh peng cheukhat zong ah thimnak luh ding in timhtuahnak kan ngei. Magwe ramthen belte hi Ascho-Chin party an um caah anmah he ceihmainak ngeih tak a hmasa a hau lai” tiah The Chinland Post ah a chim.

Register an ngah in pengkip ah party signboard tarnak le zung hunnak an tuah colh lai. Register namber an pek hna lo ruang ah zeihmanh rian an thawk khawh rih lonak hi a si. Cun, hluttaw palai aa cuhtu ding cu pengkip cio nih anmah peng chung in mipi nih an bochanmi le an zumhtlakmi hna kha an thim cio hna lai. Cu an thimmi hna kha central ah thawng an thanh hna lai. Amyotha le Pyithu hluttaw thimfung hmunhma kong tibantuk buainak a um sual belte ahcun a herhning in central committee nih an tlangtlakpi hna lai tiah kan theih.

“A ralaimi thimnak ah 2010 le 2015 thimnak phichuak kan hmuhtonmi zohchih in Chin mizapi nih CNLD hi tha an kan pek in an kan vote ko lai ti ruahchannak kan ngei. Cu ruang ah Chinram ahcun CNLD nih teinak kan hmuh hrimhrim ko lai. Amah belte, hluttaw palai aa cuhtu ding hi mizapi nih bochanmi le zumhmi palai an si ding a biapi tuk ve” tiah a biapeh ah a chimchih.

CNLD cu Chin party phuthum komh in dirhmi party a si. Cu party pathum hna cu; Chin National Democratic Party (CNDP), Chin League for Democracty (CLD) le Chin Progressive Party (CPP) an si. Caan tampi chung i fonhnak khua an khang lengmang nain an i fonh kho lo. Chin mizapi tamdeuh zong nih i fonh i lungkhat te in rian an tuan ding hi an saduhthahpiak cio hna. Cu bantuk in atu cu an i fonh khawh cang caah thazaang thawn ngai dawh an si cang.

Leave a Commnet

%d bloggers like this: