CDF-Zotung Commander in Chief telh in hriamtlai 3 SAC ralkap nih an thah hna
The Chinland Post | 2022 August 4 – Chin ramkulh hriamtlai phu a a simi CDF-Zotung Commander in Chief Thah Ceu telh in hriamtlai 3 cu SAC ralkap nih July 27 ah an thah hna i an ruak an khangh hna tiah CDF-Zotung nih a thanh.
SAC ralkap pawl cu July 22 ah Chin ramkulh, Matupi peng Ramsi khua ah an rak lut i khuami 27 biakinn chungah an rak tlaih hna.
CDF-Zotung biachimnak nawl a ngeitu nih “Commander in Chief le adang 2 cu khuami hna zei an lawh hnga, an hrem sual hna hnga maw tiah an va bih hna lioah hmunhma ṭha tein a rak la cangmi SAC ralkap pawl nih July 23 ah an tlaih hna. An tlaihmi hna hi khuami nih an thei lo. July 27 ah SAC ralkap nih mei an khanghmi ah ruak haw kan theih an ti. An ruak kha mi zei dah an si cu thleidan awk a ṭha lo nain 3 an si caah Commander in Chief te an si ko lai tiah kan fehter” tiah a chim.
Thah a tongmi hna hi CDF-Commander in Chief Thah Ceu (Kum 40), CDF-Zotung hriamtlai Aung Min (Kum 20 hrawng) le Thang Cin Mang (Kum 20 hrawng) hna an si.
SAC ralkap nih an tlaihmi khuami 27 cu August 3 ah an thlah ṭhan hna tiah theih a si.
About The Author
