Chin Media Le Us In Lairam Ah Intership A Rak Tlungmi Lai Mino Tonnak An Ngei

0

Salai Bawi| 2018 June 4| US in Lairam ah Internship in a raktlung mi Lai sianghleiruun mino le Hakha um Chin Media pawl itonnak cu Chin Centre for Peace and Reconciliation (CCPR) tawlrelnak in The Chinland Post @Fidi Foundation zung, May 30 ah tonnak an ngei.

Hi itonnak ah hin Chin Centre for Peace and Reconciliation (CCPR) ah intern a tuanmi Salai Van Lal Lian nih Internet le Social media hman ningcang le Website tuahtoning kong chimfiannak a ngeih hna. Cun, Chin Human Rights Organization (CHRO) he a tuanve mi Mai Sui Tin Tial nih, “Thawngpang Tialnak he aa pehtlai in research tuah tikah fact pawl an biapit tuknak kong” timi tlangtar in a chim ve.

Cun, Ramdang lei mino nih Chin Media le Online cung news tialtu hna an hmuhning kong zong chimfelnak an ngeiti hna.

“Cheukhat news a thlahtu cu an laaknak thawngpang hrampi hi rinhtlak taktak mi (reliable sources) an si lo. Rinh tlak le bochan tlakmi thawngpang i cherhchan lo in bochan tlak lomi le adeu thawngpang (fake news) pawl deuh khi an tial i an thanh. Kan chim tak ko ahcun, Kannih US lei mino tam deuh nih cun kan zum ti hna lo. A rel zong kan rel hna lo. Mahbel, mirangca a rel kho deuh lomi upa cheukhat nih an rel ve hna i a poi ngai kan timi cu, cheukhat upa pawl cu an rel mi paoh kha an zumh dihmi hi asi,” tiah Salai Van Lal Lian nih a hmuhning a chim.

Khonumthung Media in Editor Pu Tui Dim nih, “Chin Media tiah auh tikah hin ramdang lei pawl zong nih nan thleidan thiam a herh ngaingai. A ruang cu, online men in thawngpang a lettu hi Chinland Post nih an chimning ah cun phu 70 renglo an si cang. Mahhna hi, Chin Media ti awk an tha tuk lem lo. Kannih cu, cozah nih theihpi mi register (hmatpungting) a ngeimi kan si cang. Cucaah, phungningte in Chinmi caah a tuanmi lawng hi atu tiang ahcun Chin Media ti awk kan si,” tiah a chim.

Hi tonnak ah The Chinland Post, The Hakha Post, Khonumthung le The Chin Journal an i tel kho.

About The Author

Na ruahning rak langhter ve.. (Leave a comment)

%d bloggers like this: