May 24, 2024

Chin Miphun Ni Ah Mai Run Sung Khuangcawi A Si Lai

0

City Hunter| 2018 February 8| Hakha ah tuahdingmi avoi 70nak Chin Miphun Ni ah Hakhathar in Mai Run Sung khuangcawi a si lai.

Hi kong he pehtlai in Hakhahtar khuabawi Pu Tawk Lian nih, “Tukum hi Cawbuk sang cawi caan asinain cozah lei nih nanmah sang nih cawi ko uh an kan ti caah February 5 zan ah Hakhathar khuapi vantlang sangpi te in meeting kan tuah i Mai Run Sung cawi ding in bia kan chah. Sang upa nih anmah chungkhar lei zong kan lenkai i lunglawmte in an kan cohlan. Cozah, sangmi zapi le khuangcawi dingmi chungkhar i bawm in tlamtlinh khawh kan i zuam lai. February 8 zan thawk in Hakhathar, Pu Ni Khuai inn ah hla le laam cawnnak kan thawk cang lai” tiah The Chinland Post ah a chim.

Khuangcawi dingmi Mai Run Sung nih, “Kanmah chungkhar an kan thim tikah kan khuaruah a har, kan lau ngai. Kei hi zei lei paoh ah hawi tlukmi ka si lo. Cu bantuk ka si ko bu ah sangmi nih hnakkar tenh le dawtnak he khuangcawi ding in a kan thimmi cung ah kaa lawm tuk” tiah The Chinland Post ah a chim.

Mai Run Sung a chuahkehnak cu Hakha Khuahlun a si. Pu Ni Khuai le Pi Hoi Vang i an fanu hniang bik a si. Atu hi Hakhathar sang ah an um. Amah hi chuakti unau pa 5 lakah a hniangbik a si. Chin ramkulh cozah zung ah cazi rian LD a tuan lio a si.

2017 kum avoi 69nak Chin Miphun Ni ah Hakha Khuathar in Mai Biak Tha Cuai khuangcawi a rak si. Khuangcawi timi hi Lai nunphung lakah sunhsak taktakmi pakhat a si. Hlan ahcun bawite a bawi khomi, cakei a fim khomi tibantuk miphun sang pawl lawng khuangcawi an rak si.

Photo: Mai Run Sung private fb.

About The Author

Na ruahning rak langhter ve.. (Leave a comment)

%d bloggers like this: