CCU Ah BBA A Kai Liomi Hna Le Mari Stock Nih The Green Hakha Project Timi Thianhlimnak Lei Kong Theihhngalhternak An Tuah
Chin Christian University (ahlan CCC)
Salai Ngun San Aung| 2018 January 6| Chin Christian University ah Bachelor of Business Administration (BBA) kum 3nk le kum 4nk a kai lio mi hna le Mari Stock i bawm in The Green Hakha Project timi khuachung thianhlimnak le ngandamnak kong theihhngalhter nak an tuah cuahmah tiah kan theih.
Hi kong ah BBA kumlinak a kai liomi Mai Zing Dawt Cer Chin cu The Chinland Post nih an rian tuannak kong hal nak kan tuah.
“Hihi Mari Stock nih he i bawm in kan tuan mi a si i hi project caah a herh mi tangka zong anmah nih an kan bawmh. Feb. 5 in khan zatlang thawngthanhnak (Facebook) ah “Trash in my pocket-” timi kan tuah dingmi lak ah pakhat cu thanh hram kan thawk i hmunthur char ngai cu kanmah zong nih kan thawk kho rih lo. Tu hi thawk kan timh bak a si. Hi ahhin kanmah lawng siloin mizapi i tel khawh cio a si. A tuah ningcang zong zatlang thawngthanhnak ah kan thanh cang. Cun February 14 (Valentine Day) tik ah khin Mari Stock he i bawm in Fashion awareness timi duh paoh in hmunthur hlonh a that lo nak, tuah lo ding in theihternak ding ca hmuhsaknak kan tuah chih lai. Kan project hi February thla dih ca tiang lawng a si nain hmailei zongah pehzulh khawh cu kan duh ko” tiah a chim.
Hi rian cu BBC nih Project Management an cawnmi a tak in hman thiamnak ding caah Norway lei in CCU ah ca chimh ding in a rak tlung Sayama Ni Bor Chin nih a bawmh hna tiah kan theih. Cun hi project ah a herhi tangka ah Mari Stock nih an bawmh hna leng ah cawlcanghnak zong ah Mari Stock i a tuan liomi Dr. Biak Cung Lian @Cung Pi nih biatak tein a tel pi hna.
Hi project nih aa tinhmi le aa hmaithlak bik ding mi hna cu Vision: (1) A ngan a dammi le a thianghlim mi pawngkam ser ding le (2) Zeitin kan tuah ah dah kan ngan a dam lai ti le zei kan tuah ruang ah dah kan zawt ti le zeitin dah kan i thianhhlimh lai ti mi hna theihter ding ti mi an si. Tlangtaar ah Life is Short, Stay Healthy-Nunnak hi a tawi, ngandam tein um timi a si. An Mission cu- To raise awareness about healthy lifestyle for a greener Hakha-A hninghno deuh mi Hakha si ter awk caah a ngandam mi nunning kong ralrin pek le theihternak ti a si.
Hi project ah facebook a hmangmi paoh nih hibantuk hin i tel khawh cio a si. Hmunthur na char mi funkhat in hman na thlak lai i na tar hnu ah hitihin can a tial lai. #Trashinmypocket #theGreenHakhaProject tiah tial ding. Cun an tag tu a facebook min kha tial ding. Kei ka hmunthur charmi! Nangmah caan! Tiah tial hnu ah hawi pathum in tag ve ding. Mah leng ah nangmah siarem ning in ca tial chih khawh a si.
Hi project nih hin pawngkam khuachung pawngkam thianhlim tiang lawng siloin a thurhnawm mi pawngkam kan um ruangah zeibantuk zawtnak dah kan ngeih khawh tibantuk le zeitindah kan i thianhhlimh lai ti pawl kha theihternak le cawnpiaknak aa tel leng ah Women empowerment timi Nu hna dirhmun cawisan le thazaang peknak lei kong a simi Mari Stock nih aa hmaithlak mi rian pakhat zong biatak in telh chih ding a si tiah kan theih.+++
About The Author
