Chin Miphun Ni Ah Rampi Hruaitu Upa Hna Pinah Sagaing Le Magwe Ramthen Chief Minister Zong An Sawm Hna Lai

Salai Elvis| 2018 January 18| Avoi 70 nak Hakha ah Chin ramkulh ai-awh in tuah dingmi Chin Miphun Ni ah khual lawng in minung 500 in 800 kar an phan te lai tiah ruahchung a si nak kong Chin ramkulh sipin lutlai Pu Thla Hre nih a chim.

“Mah ni ah khual lian sawmding mi hna cu rampi lutlai hna tiangin sawm an si lai. Cun Kawlrawn um Lai miphun paoh sawm an si, Sagaing ramthen le Magwe ramthen Chief Minister zong sawm an si. Cu pinah Mizoram lei kan unau zong an sawm ko hna lai ti ka zumh. Sawm awk tha paoh sawm dih ding ti a si. Cu caah khual in minung 500 in 800 kar an ra theu lai ti zumhnak kan ngei. Cun ramchung hlasakthiam minthang zong sawm an si lai. Ring-awn lei zong mizei kan sawm hna lai a fiang rih lo” tiah Pu Thla Hre nih a chim.

Hi chungah a dihding tangka zong kumdang nak tlawm lo in tuaktaan a si. Sub-committee pawl nih an mah le rian cio a dih ding mi zat an suaisam mi kha hnatlak a si ko lai. Hmaikum lei in cun Haithlan ah Laimi nih puai kan ngeihmi paoh, khika hmun ah tuah a si cang lai. Tukum cu timhtuahnak kan ngeih lo caah Vuan Tu Maung certual ah kan tuah rih ko lai” tiah Pu Thla Hre nih TCP ah a chim.

February 18 ni ah hmuhsak ding (piah-khaan) lepuai hunnak tuah dih a si lai i 19-20 ni hnih chung nuamhnak tuah a si lai. Khi ni ah Chin ramchung khuapi lakah a thianghlim bik khua timi zong laksawng peknak le pengkip cio in Koh-ti (Golf) tuk zuamnak le laksawng peknak zong a um lai tiah theih a si. +++

Leave a Commnet

%d bloggers like this: