Hakha Myoma Market Dawrkhan Sokmi Pawl Mee An Zuhter Cang Hna Lai

Hakha market sak dingmi design

Salai Ngun San Aung| 2018 January 17| Chin ramkulh Khuahlipi Hakha ah sakmi Myoma Market ah dawrkhan a sokmi pawl tu thla 26-27, nihnih chung Hakha Town Hall ah mee zuh a si cang lai.

Hakha Myoma Market sak thar dingmi hi dot thum a si lai i dawr khan 42 a um lai ti a si. Hi chung ah a hlan lio Market i dawr ngei pawl kha an i tel lo. Dawrkhan a rak ngeihcia mi pawl cu tangka tlawmpal chap in dawrkhan pek an si than.

“Dawrkhan hi phun hnih in then a si i mehhang le thilpuan tibantuk pawl zuarnak an si. Khan 13 le khan 29 a si i a dihlak fonh ah khan 42 a si. Hi lengah a hlun lio i dawrkhan a ngei cia pawl kha a dang tein an um rih. Cun dawrkhan thar a sok mi hi 371 an si. January 26-17 ah a soktu pumpak hrimhrim ra in Town Hall ah mee kan zuhter hna lai. Nupi maw pasal tibantuk zong rat a ngah lai lo. A soktu min ning tein khan a si lai i mah pumpak hrimhrim nih mee zuh a hau lai. Nikhat kan lim deuh lo sual ah tiin nihnih chung tuah kan timh. Cun mee an zuh hlan dawrkhan ca mee zuh ning kan tuahmi ah langfiang tein kan tuah ningcang pawl kha kan chimh hmasa hna lai. Zing sml. 9:00 kan thawk lai” tiah Chin ramkulh Sipin Director Pu Thla Hre nih TCP ah a chim.

Hakha Myoma Market dawrkhan pi cu Excel Design Company nih sing 9300 in tender an i tlaih i an tuan lio a si. Foundation an chiahmi a that lo caah technical Consultant auh hmasa i cu hna nih a tha an ti ning tein a thar in sak than dingah tuanvo ngeitu lei nih rian an dinhter hna lio a si tiah kan theih. +++

Leave a Commnet

%d bloggers like this: