Chin Public Company An Dirh; Dr. Sui Hingz Nih Share Cawk Ning Le Riantuan Timhmi A Fianter

Salai Ngun San Aung| 2018 May 25|  Chin ramkulh chung ah thanchonak rian tampi in tuah khawhnak ding hmuitinh he Chin mirum minung 25 nih sing 20,000 tangka hram phum in Chin Public Company an dirh. Cu he pehtlai in a dirhtu a simi Dr. Sui Hingz nih a an dirhnak a ruang le share cawk ning kong pawl fianternak a tuah.

“Ramchung, Ramleng um Chinmi nih kan miphun kan dawt dih. Khua tampi kan ruat. Kan ram caah thanchonak kan kawl. Laitlang a thanchonak dingah investment a hau. NGO lawng cun si kho lo. Rian ngei vialte i fonh in Public Company kan dirh lai kan ti. Minung 25 hi Director caah kan i sawm. Sing 20,000 kan chuah. Director ah tel a duhmi nih cun minung pakhat nih sing 500 tal a thawh lai ti si. Asinain minung pakhat nih sing 1000 tiang lawng i telnak nawl kan onh. Share pakhat caah 10,000MMK kan hauh. Share hi class A le class B in kan then i Class A cu Director chungtel si a duhmi lawng nih cawk khawh a si caah sing 500-Sing 1000 kar man a si. Zapi nih hin 10,000 man in sing 499 man tiang a cawk khawh. Asinain minung pakhat nih a tlawmbik sing 10 man (Share cun 100) lawng a cawk khawh. Cu nak tlawm cu a si kho lo.”

Tuhi Cozah he bia ruahnak an tuah cuahmah lio a si i hmailei ah Chin Public Company nih a tuan dingmi le aa hmuitinh pawl kong ca an tialmi kha Cozah lei nih an zoh lio pi a si caah tu hnu thla 3 tluk lawngah Share hi an zuar thawk te lai tiah kan theih.

Dr. Sui Hingz nih cun, “Hi kan company hi Security Exchange Commission of Myanmar (SECM) sinah tha tein register kan tuahmi a si caah. Hi company ah share a caw mi pakhat khat kha a thihloh sual ahcun a chungkhar nih a cawkzat share kha an co khawh lai. Tangka luhchuah ning (Financial Statement) zong felfai tein kan chuah lai” tiah a chim.

Chin Public Company nih a tuan dingmi rian pawl cu, “hmunhma, khuati le vawilei hoih in a chuakmi thil (Coffee, Tawlreba, Thiamtah) tibantuk cinthlak, zuatkhalh le kutzung thiamnak pawl ningcangtein an tuah khawh nakhnga tha tein kan chimh hna lai i value added kan tuahpiak hna hnu ah ramleng tibantuk tiang kan zuarpiak hna lai. Cun Tourism (khualtlawng zohkehnhnak) zong tuah kan duh. Falam peng Surbung Vanlawng bual pawng ah khin Tourism Center pi kan sak lai. Zinghmuh tlang hna ah khin Banglo khual riahbuk kan sak lai” tiah Dr. Si Hingz nih cun a fianter.

Chin Public Company ah share cawk caan hi tu hnu thla 3 tluk in thawk a si lai zuar caan hi rikhiah mi a um te lai. Chin ram thanchonak caah papek in rian atuan dingmi an si caah Chin miphun kha papek an si lai. Hi company nih share 50,000 a ngeih lai i hi chung ah Director hi minung 30 tiang cohlan an si duh caah Share 30000 hi sing 500-1000 kar Class A share asi lai a tangmi share 20000 hi ramchung ramleng in Chin mi caah an zuar lai. Ram chung ummi cu papek an si lai tiah kan theih.

Na ruahning rak langhter ve.. (Leave a comment)

%d bloggers like this: