Chin Ramkhel Biaruahnak Cauk Chuahmi Peknak le Zanriah Dumtiding Chin MP Sawmmi ah Kachin le Rakhine MP Pahnih Lawng An Kai

Chin National Dialouge of Joint Committee (CNDJC) hruainak  in February 27-March 1, 2017 tiang Thantlang khuapi ah Chin Ramkhel Biaruahnak ngeihmi kong Cauk chuahmi cu Naypidaw Chin Hluttaw dihlak pekchanh ding le zanriah dumtidingin  tangka bawmchantu Chin Center for Peace & Reconciliation (CCPR) nih sawmmi ah Rakhine Hluttaw palai U Hlah Saw le Kachin Hluttaw palai U Lamanaw lawng an kai tiah theih a si.

Chin MP Naypidaw Pek timhmi Chin Ramkhel Riaruahnak Cauk le CNF Cozah Cauk

Hi kong he pehtlai in NLD Chin ramkulh Chairman le Amyotha Hluttaw Pu Bawi Khing nih ” Kan nih cu phung le phai kan ngei. Hluttaw minung pawl a lenglei he ton duh ahcun Hluttaw chairman ah khunh lak ahau. Cu khunh an lak lo caah kan kai lonak a si” tiah The Chinland Post ah a chim.

“Hi Naypidaw Zanriah dumtinak caah tawlreltu Salai Puite nih Pu Hniar Uk nih khunh na lak ahau a ka ti. Midang zong Kanmah zong nih Hluttaw biaruahnak kan tuah lengmang ko caah zarhpini zanriah eitinak le cauk peknak kong cu a herh lai lo tiah ka ti caah cu ruang ah an rat lonak a si men lai” tiah The Chinland Post ah a chim.

Hi kong he pehtlai in Rakhine le Kachin MP a rak kaimi Hluttaw Palai U Hlah Saw le Lamanaw nih ” Hluttaw khunh hal timi cu Hluttaw kai caan i kan kai khawhlo tiangin workshop, training le meeting bantuk kan kai lawngah Hluttaw chairman sin ah khunh hal a si. Hi bantuk Hluttaw kailo caan zarhpini le zan riah einak kongah kan hal bal lo” tiah The Chinland Post ah an chim.

Hi kong he pehtlai in CNDJC Convenor le tawlreltu Salai Aung Min Hlaing nih Chin ramkhel party pawl kan dirhmun cu hihi a si ko. Rakhine le Kachin tu nih hi Chin Ramkhel Kong kan ceihhmaimi tu hi cawnnak ah hmang izuam kho ve u law hmailei federal ramkomhpi kan ser tikah awkhat in kan kal ti khawhnak hi abiapi tiah ton biaruah lio ah a chim.

“Thantlang Chin National Dialogue tuah kan tim lio ah harnak tampi kan tong, Rakhine le Chin lawng peklomi a si.. Cozah lei nih an duh setsailomi kha CNF, Cozah lei, Chin Ramkhel Party le Zatlangbu i bawm in minung 700 kai in kan rak tuah khawh. Hi tuahnak ah NLD upa, Chin Ramkulh Cozah, anmah Hluttaw pawl lila an itel lengah NLD in MP Ni Sui Lian zong CNDJC Zohfeltu ah a tel vemi a si. Cu Chin ramkhel kong tangka tampi dih in ceihhmainak Cauk sunglawi peknak le rawldumtinak serpiakmi ah an rat duhlo hi cu Remdaihnak lamthluan le kan miphun lamthluan ah pakhatkhat cu a palh cang.” tiah Pu Zo Zam nih The Chinland Post ah a chim.

Chin MP Zanriah Dumtinak A Phanmi

“Tangka tampi dih in Chin ramkhel Biaruahnak cauk kan chuahmi lengin CNF le Cozah kahdaihnak Biahren cauk, UPDJC ramkhel hnatlakmi biatung 37 pekpah in zanriah dumtinak kan tuahtimhmi a si. Party kong pakhat hmanh aa tellomi remhdaihnak kong he aa pehtlaimi a si. Cucu kan Chin MP Palai zapi nih kan theipi hna sehlaw Hluttaw an kainak ah siseh Cozah sin ah remdaihnak kong kan norpi hna seh tiah kan timhmi ah zanriah einak ah khunh hal ahau timi ruang i an rat lo cu kan lung a tha lo ngai. Atulio kan Chin MP pawl he riantuan hi a fawimi cu a si bak lo” tiah CCPR riantuantu pakhat nih The Chinland Post ah a chim.

Hi ton biaruahnak ah Pu Ceu Hlei Lian sinin Vice President II Pu Henry Van Thio zong sawm a si nain akai kho lo tiah theih a si. Salai Zung Hlei Thang (NLD MP) zong a rak kai nain NLD a hawi le a hmuh hna lo caah a kir than tiah theih a si.

Chin Ramkhel Riaruahnak Cauk Peknak le Zanriah dumtinak cu Naypidaw Chin Hluttaw minung 20 ah minung 15 an itel kho lai tiin January 28, 2018 zarhpini zanlei 5:00-7:00pm kar CCPR tawlrel bawmchanhnak in tuahtimhmi a si. Aho hmanh an rak kai lo caah cheukhat MP cu Jan 29 zingka an inn kal hnawh in pekchanhnak an ngei than hna tiah theih a si.

Leave a Commnet

%d bloggers like this: