Chin Miphun Ni Paih Ruah Bak Ah Rung Lian Ceu Hakha A Tlung Lai
City Hunter| 2018 January 29| Voi 9 aa pai i voi 7 bakte champion a cotu Lai pasaltha Rung Lian Ceu cu avoi 70nak February 20, Hakha ah tuahdingmi Chin Miphun Ni paih ruah bak ah World Paih Championship Phu in Haotu Pu Ang Cung nih Hakha a rak tlunpi lai tiah kan theih.
Hi kong he pehtlai in World Paih Championship a dirhtu le haotu a simi Pu Ang Cung cu The Chinland Post nih pehtlaihnak kan tuah i atu bantuk in a chim.
“Voi 9 aa pai i voi 7 bakte champion a co cangmi Lai pasaltha Rung Lian Ceu hi nikum Hakha ah tuahmi Chin Miphun Ni ahkhan rak tlunpi ka timh cang nain kan tlung kho than lo. Tukum cu Hakha, Chin Miphun Ni paih ruah bak ah keimah le Chin Cable Network in Salai Cung Khenglawt he kan rak tlung lai. Vanlawng ticket zong kan cawk dih cang. Kawlram kan phak belte aa khat dih lai lo. Rung Lian Ceu hi February 6, zingka suimilam 7 ah Myanmar ram a phan lai i kei hi February 6 zan suimilam 10:00pm ah ka phan ve lai. Hakha lei kan naupa nih a rak kan don lai i kan zapite in Laitlang lei cu kan tlungti dih te lai. Salai Cung Khenlawt belte hi February 12 lawng ah Myanmar ram a phan ve lai” tiah Pu Ang Cung nih The Chinland Post ah a chim.
“Hiti paih ruah bak ah Hakha tlun kan timhnak a ruang bik cu World Paih Championship phu nih kan i tinhmi chunmang tlinter kan duh caah a si. Ramchung lei paih thiam le champion pawl kha US lei ah kan cah hna lai kan ti nain kan cah khawh hna lo caah kanmah tu kan rak tluntimhnak hi a si. Hakha, Chin Miphun Ni ah World Paih Championship a cotu Rung Lian Ceu a zuamcawh ngamtu paoh nih chuah hnawh le zuamcawh khawh a si lai. Zatlang paih hi cu amah nawl siseh, kaa pai lai a ti le ka thlauh lai lo, kaa pai lai lo a ti zong ah ka forh lai lo. Asinain zuamcawh tu cu aa pai hrimhrim ko lai” tiah a biapeh ah a chimchih.
Hakha ah tuahmi Chin Miphun Ni paih ah Rung Lian Ceu paih ruah bak ah Hrang Tin le ramdang in minung pakhat zong Hakha tlun an i tim tiah kan theih.
Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. Rung Lian Ceu hi 1994 July 3, Chuncung khua ah a chuak. American a phak hnu ah voi 9 aa pai cang i cu chung ah voi 7 bual a co cang. Chinmi chung ah Rung Lian Ceu tluk in Chin miphun ni sunglawi ah bual a comi an um rih lo tiah kan theih.
Pu Ang Cung hi World Paih Championship Phu a dirhtu a si. Amah a chuahkehnak hi Hakha Khuahlun a si. Lai nunphung le lentecelh tha a petu i a cawisangtu pakhat zong a si. World Paih Championship nih aa hmuitinhmi suttung pathum cu; Lai Pa thawng vialte nih Lai Paih in pawcawmnak khim tiang laksawng an hmuh khawhnak ding, ramchung ramleng hmunkhatte ah Lai Paih i hrawmti le i paihti ding, a pathumnak cu Lai Paih hi Sea-game tiang luhpi ding hi an si tiah kan theih.+++
About The Author
