Chin Ramkulh Chung Ah Hramhram In Mi Thilfirnak A Tam Chin
The Chinland Post | 2023 July 6 — Hramhram in uknak lak a si hnu Chin ramkulh chung ah mi thilfirnak hna telh in mah innchung ah rak luhhnawh riangmang in nunnak tiang ṭhihpheih hnu ah mansung thilri firpiak dirhmun hna a karh chin.
Cubantuk thil sinning hna hi SAC nih an tlaihnak khuapi chung ah a can a tam khun i khuami hna nunnak le himnak caah thinphang in an um cio tiah theih a si.
“Hakha ah a rak phan thar mi SAC ralkap pawl hi a hlan ralkap pawl he an i dang tuk hna. An hrang tuk i an sual tuk fawn. Zaan ah mipi inn ah an lut i an thilri hramhram in an chuh hna” tiah Hakha khuami pakhat nih a chim.
Cubantuk in Mindat le Matupi khuapi ah khua a sa mi hna innchung ah SAC ralkap pawl nih zaan ah luhhnawh ruangmang in meithal hmuah hnu ah mansung thilri pawl an lakpiak hna tiah theih a si.
Ramkhel dirhmun ruang ah ramchung, ramleng ah a zaam mi Chin miphun hna inn kip hna cu SAC ralkap nih an bauh i mansung thilri, mansung miphun thuamthil hna le sia hna an fir i an thah tiah theih a si.
“Zaan sml 6:00pm hnu ah a hohmanh leng kan chuak ngam ti lo. Mah innchung te um hmanh ah a him tiah hnangam khawh a si ti lo. SAC ralkap pawl nih atu le atu luhhnawh le thilri lakpiak a si tik ah khua kiangkap ah a um mi hna hi an lungrethei khun” tiah Matupi khua nu pakhat nih Ayeyarwaddy Times ah a chim.
A luancia June 29 zaan sml 9:00pm luan hrawng ah Matupi khua, Laungvan sang um khuami pakhat inn cu SAC ralkap 2 nih mipi thuam in hriam he luhhnawh riaangmang in hramhram in an thil an chuh hna i an nupa in an velh hna leng ah an nu suiṭhi le tumbul an lakpiak hna tiah theih a si.
Chin ramkulh hmunhma a tam deuh ah SAC ralkap nih Internet Line le Phone Line hna an thah i mipi hna nih zeibantuk thawngpang hmanh thei hna hlah seh tiah a tuah hnu ah mipi ngeih mi thilri chuh le nuhrin covo buarnak hna hramhram in an tuah i zeibantuk phu hmanh nih dantatnak an tuah kho ti lo tiah theih a si.
About The Author
