Chin Ramkulh Matupi Le Mindat Ah A Hmasa Bik Digital Fimthiam Cawnnak Centre An Hun
Matupi
City Hunter| 2018 May 3| Myanmar ramchung ah a sifak bikmi Chin ramkulh ah alak in Digital fimthiam cawn khawhnak ding A-lin-eain (အလင္းအိမ္) centre cu Matupi le Mindat ah a hmasa bik hunnak an tuah tiah Telenor company nih April 30 ah thawngthanhnak an tuah.
Chin ramkulh tualchung mino hna nih alak in digital fimthiamnak an cawn khawhnak ding caah April thla chung ahkhan Mindat le Matupi khuapi chung ah A-lin-eain (အလင္းအိမ္) centre pahnih hunnak an tuah hi a si. May thla chung ahhin Kanpetlet ah hunnak an tuahchap rih lai.
“Lam le sul chiatnak le pehtlaih a harnak hmun i khua a sami hna nih digital fimthiamnak an ngeih i an thancho deuh nakding caah A-lin-eain centre hi bawmchantu tha taktak a si lai. Hi centre nihhin i pehtlaihnak le digital fimthiamnak tampi a pek hna lai i Chinram chung um, mizapi thanchonak tampi a bawmhchanh lai ti fekte in kan zumh” tiah tuanvo ngeitu U Min Thu nih a chim.
Telenor company nih A-lin-eain Digital fimthiamnak program cu Myanmar ICT phu (MIDO) he i bawm in 2014 in an rak thawk i ramkulh le ramthen zapi ah A-lin-eain centre cu hunnak an tuah. Atu ah siangngakchia singkhat (100,000) an cawnpiak cang hna. Tukum chung ah siangngakchia 50,000 tluk cawnpiaknak ngeihchap rih ding in Telenor lei nih thawngthanhnak an tuah.
Myanmar ramchung khuate um mizapi nih digital fimthiamnak lei an thanchonak ding an i hmuitinh i computer le smart phone ningcang, a himmi internet hmanning tibantuk cawnpiaknak ngeih ding in A-lin-eain program an thawk hi a si.
Ref: 7Day Daily News
About The Author
