Senator Dean Smith; Australian Parliament Ah Chinram Le Chin Miphun Kong Ka Chim Cang Lai
Senator Dean Smith
City Hunter| 2018 May 4| 2018 kum January thla ah Chin ramkulh a tlawngmi Senator Dean Smith nih a hmuhtonmi kong cu May thla zerhhnihnak ah tuahdingmi Australian Parliament ah ka chim phuan cang lai tiin Chin Charity upa te he ton biaruahnak ah a chim tiah kan theih.
“Senator Dean Smith nih a chimmi cu, Chin miphun an bawmtu hna caah champion si kaa zuam lai i atu lio Chin miphun nih nan herh bikmi hna chung in…
(1) Australian Citizenship sawk/ pomnak kong
(2) Malaysia le India ummi Chin miphun kong le
(3) 202 visa in chungkhat auhnak kong hna hi Australia ram nawlngeitu hna sin ah dengteo tein chim kaa zuam lai. Australia um Chinmi a bawmtu hna Australian Parliamentarian Support Group zong ser le tuah khawh kaa zuam lai i Chin miphun ca i ka tuaktanmi vialte hi Chin Media Phu sin zong ah chim phuannak ka ngei te lai a kan ti” tiah Chin Charity Chairman Pu Renny Ceu Lian Mang nih The Chinland Post ah a chim.
“Keimah Chin ramkulh ka va tlawnnak thawng in Kawlram i Australia cozah zung le Australia ram cozah nih Chin miphun le Chin ramkulh caah zawnruahnak le zaangfahnak thinlung an ngei deuh hrimhrim lai ti ruahchannak zong ka ngei” ti zong a chimchih.
Australia hluttaw ah MP pakhat a simi Senator Dean Smith cu January 23 ah Hakha a phan i January 26 zan tiang a caam hnu January 27 ah Kalay ah a kir than. Chinram a caam chung ah Chief Minister Salai Lian Luai telh in Chinram cozah bu, hluttaw speaker Pu Zo Bawi, Hakha khuanu, khuapa, Chin zatlang bu, CNF, biaknak lei hruaitu upa, CCU riantuantu, Chin Media, siangngakchia bu, Hope Blood Donor Organization, ramkhel party le MP a tuan liomi palai pawl he ton biaruahnak an ngei kho.
Cun, Hakha sii-innpi, Hakhathar, Hakha Khuahlun a rawkralmi, HBA tualrawn velchum, Ralkap Tidil a rawkralmi, Khuacuanhnak tlang, Hlawhtling thlacamnak tlang, Solomon Van Hre inn, Thantlang CNF zung le Tikir Dam tibantuk hmun ah vehvatnak le tlonlennak a va ngei kho.
Senator Dean Smith hi Australia ram senator (hluttaw) lakah a hmasa bik Chinram a rak tlawngmi a si. Senator Dean Smith hi Australia ram ah senator (MP) 76 an um, cu lakah senator pakhat a si. Kawlram hi voili 4 a phan bal cang. Australia ram in cozah le senator vialte lakah 2018 January thla ahkhan a hmasa bik Chinram a rak tlawng. Hakha lawng hmanh si lo in Thantlang peng VP Henry Van Thio chuahkehnak Tikir khua tiang a va phan khomi Australia senator pakhat a si. Naypyidaw ah Vice President Henry Van Thio zong a va ton tiah kan theih.
Senator Dean Smith Laitlang a khuallam cu Australia ram ah khua a sami Australia Chin Federation Vice Chairman le Chin Charity in Chairman a tuan liomi Pu Renny Ceu Lian nih a rak zulh.
Senator Dean Smith cu Chinram a rak phak lio le Australia Day (National Day) aa ton caah Hakhathar nu upa hna he Van Hre Nunphung Hmuhsaknak inn ah Australia thantar thlirnak le Lai laam laampi nakin January 26 ah sunglawi ngai in caan an hmang. Australia Senator lakah a hmasa bik Chinram a phanmi lawng si lo in Australia cozah chung in Chinram ah a hmasa bik Australia Day a hmangmi senator pakhat zong a si.
About The Author
