Chin ramkulh thla 6 chung kahdohnak ah SAC ralkap 900 leng an thi tiah CJDC nih a thanh
The Chinland Post | 2022 August 11 – Chin ramkulh cung peng 9 ah 2022 February 1 in July 31 tiang (thla 6) chungah SAC ralkap le CJDC aa telhmi Chin hriamtlai phufonh karlak kahdohnak ah SAC ralkap 900 leng an thi tiah Chinland Joint Defense Committee (CJDC) nih August 11 zaanlei ah a thanh.
Kahdohnak hi Chin ramkulh Tonzang ah voi 2, Falam ah voi 7, Thantlang ah voi 9, Tedim ah voi 13, Matupi ah voi 18, Kanpetlet ah voi 24, Mindat ah voi 35, Falam ah voi 44, Hakha ah voi 45 le CJDC chungtel a simi CDF-KKG an umnak Kalay-Kabaw-Gangaw ah voi 23 tiah a zapi te kahdohnak voi 220 a chuak tiah an langhter.
CJDC aa telmi thla 6 chung kahdohnak ah SAC ralkap 927 an thi. CJDC chungtel hriamtlai 53 nih ram le miphun caah an nunnak an pek tiah CJDC thawngthanhnak in theih a si.
Atulio hi, Chin ramkulh Hakha khua pawngkham ah SAC ralkap le CDF phufonh hna larkah ah kahdohnak a fah lio a si i SAC ralkap a thimi an tam tiah theih a si.
August 10 zong ah Hakha peng, Hniarlawn khuami Pi Cia Hnem cu SAC ralkap hriamngan ruangah a nunnak a rak liam.
About The Author
