Chin ramkulh, thlahnih chung ah SAC nih vanlei kahdohnak voi 53 a tuah, bom voi 138 a thlak
The Chinland Post | 2023 February 28 — Chin ramkulh, thlahnih chung ah SAC nih Kahdohnak Helicopter le vanlawng hmang in vanlei kahdohnak voi 53 a tuah leng ah bom voi 138 a thlak tiah CHRO nih a langhter.
2022 January 1 in February 27 tiang SAC nih Chin ramkulh chung ah vanlei kahdohnak a tuah mi kong he pehtlai in CHRO nih a langhter mi a si.
Hramhram in uknak a latu SAC nih kahdohnak Helicopter le vanlawng hmang in Thantlang peng ah vanlei kahdohnak voi 41 a tuah i bom voi 115 a thlak tiah an thanh.
Cubantuk in Mindat peng ah vanlei kahdohnak voi 7 a tuah i bom voi 13 a thlak kha hmuh khawh a si.
Matupi peng zong ah SAC nih vanlei in kahdohnak voi 3 a tuah i bom voi 6 a thlak.
Chin ramkulh, Hakha peng ah SAC nih vanlei kahdohnak voi 2 a tuah bantuk in bom voi 4 a thlak tiah CHRO nih mipi sin ah theihternak an tuah.
A luancia 2022 July 2 ah Mindat peng, Chat khua ah SAC nih vanlei in kahdohnak a rak tuah ruang ah sualnak ngei lo mipi 3 an nunnak a liam i minung 14 nih hliam an rak tuar.
Cun 2023 January 10-11 ah SAC nih kahdohnak vanlawng 5 hmang in CNF Headquaters bom a rak thlak caah CNA ralkap 5 an nunnak a rak liam leng ah innlo tampi zong a rak rawk.
About The Author
