Chin zatlang bawmhnak caah an hlutmi mawṭaw 1 SAC nih a tlaih
The Chinland Post | 2022 October 7 – Sagaing ramṭhen, Kalaymyo ah Chin miphun zatlang bawmhnak caah minung pakhat nih a hlutmi mawṭaw pakhat cu Shwebo khua gate ah SAC ralkap pawl nih an tlaih tiah theih a si.
TOYOTA Alphard mawṭaw pakhat cu minung pakhat nih a hlut caah Yangon khua ah an va cawk i September 1 ah mawṭaw mawngtu pakhat he an thlah i Kalaymyo khua an kirlei Sagaing ramṭhen Shwebo gate ah SAC ralkap nih an tlaih i an i fim tiah theih a si.
” Ralkap nih kawl maw na si lai tiah an hal i kawl ka si tiah a leh hna. Lai na si ahcun ka hmun hin kan in thah cang lai. Chin miphun an zapi tein misual (သူပုန်) an si. Ramtang a um mi pawl he pehtlaihnak nan ngei maw ti bantuk hna an hal hnu ah Monwya ah an kir ter i mawṭaw cu chia ta tiah an ti” tiah Chin zatlang bawmtu pakhat nih a chim.
Cu mawṭaw cu kah-nyah-nah nih a chuak piakmi License a um ko nain SAC ralkap nih an tlaih hi a si.
Cu mawṭaw an tlaih hnu ni 6 ah a cunglei pawl sin ah thawng an thanh hna i Shwebo tiang an kal ko nain an la kho lo tiah theih a si.
