June 20, 2024

Chinland Hluttaw Nih Ngunkhuai Kholhnak Kong Phunghram A Hran An Ṭial

0

The Chinland Post | 2024 May 29 — Chin ramkulh chung ah aa tlukruang tein ngunkhuai kholhnak caah Chinland Hluttaw phunghram a hran Committee nih Ngunkhuai kong phunghram a hran an ṭial tiah Chinland Hluttaw sin in thawng theih a si.

Chinland Hluttaw, phunghram a hran committee nih May 13 in May 17 tiang an tuah mi a voikhatnak meeting ah committee chungtel 18 an kai kho i phunghram a hran zong an ṭial khawh hi a si.

Ngunkhuai he pehtlai in phunghram a um lo caah cozah dirhmun in ngunkhuai hmuh lo in phunghram an dirh khawh a si ahcun mah le hmunhma, peng le Chinland cozah tiah pehtlai in rianṭuan khawh a si lai.

Asinain Chinland cozah he aa fonh rih lo mi hmunhma pawl ah ngunkhuai kholh ding hi a tlamtlin rih lo caah Chinland Council nih lunglawm tein innka an awn ko tiah Hluttaw Chairman nih a chim fawn.

A voikhatnak an tuah mi meeting ah ngunkhuai phunghram ahran lawng siloin organization pawl hmatphungṭinnak phunghram a hran, biaceihnak phunghram a hran hna an ṭial khawh tiah theih a si.

Organization pawl hmatphungṭinnak phunghram hi cozah a si lo mi phu pawl NGO le INGO hna nih Chin miphun an bawmh khawh nakhnga ca ruahchannak he a si tiah an chim.

Cubantuk in biaceihnak phunghram zong an langhter khawh lawng ah baceihnak pawl tluang tein tuah khawh a si lai tiah U Hung Naing nih a chim ve.

Phunghram a hran cu Ministry pawl, Hluttaw palai pawl nih telh khawh a si lai i cu an ṭial mi a hran 3 kha Chinland Hluttaw sin ah an kuat hnu ah Hluttaw nih a fehter lai i a rauh hlan ah phunghram ah serchuah a si lai tiah theih a si.

Chinland Hluttaw cu 2024 February 2 ah Chinland phunghram ning in Chinland Council nih a dirh mi a si.

About The Author

Na ruahning rak langhter ve.. (Leave a comment)