June 20, 2024

Tedim Khua Operation Ah Chin Brotherhood Nih An Kan Sawm Ahcun Tel Ding In Timh Cia Kan Si

0

The Chinland Post | 2024 May 30 — Chin ramkulh, Tedim khua kahdohnak ah Operation a tuahtu dothlennak phu pawl nih an kan sawm ahcun bawmhnak pek ding in timh cia kan si tiah CNA chimphuannak nawl a ngeitu Salai Htet Ni nih a chim.

Tedim khua um SAC ralkap pawl cu May 26 zaanlei ah Chin Brotherhood phu chungtel a si mi PDF-Zoland, CNDF hna nih kahdohnak an tuah i May 27 ah khuachung um SAC ralkap nih hmunhma an khuarnak hmun 2 an rak lak khawh. SAC lei nih van lei bawmhnak leng ah khuachung inn pawl a khangh ruang ah Chin Brotherhood nih May 27 ah kahdohnak an ngol.

SAC ralkap nih mipi inn a khangh nak cung ah Salai Htet Ni nih cun “SAC ralkap pawl nih ti hin an tuah lai ti cu theih cia a si” tiah a chim.

Cun Tedim khua tlamtling tein an lak khawh ahcun a ṭha deuh hnga, Tedim lawng siloin Chin ramkulh zapi hi SAC ralkap a thiannak hmunhma a si kha kan duh caah kahdohnak lei ah i bawmh le i fonh ding in timh cia kan si tiah a chim.

“Anmah lei nih an kan sawm ahcun a zungzal timh cia kan si. A si khawh chung in SAC an thian nakhnga i bawmh kan duh. Atu zong a pawngkam ah kan um dih ko” tiah Salai Htet Ni nih People’s Spring ah a chim.

CNA telh in Chinland Defense Ministry kuttang um hriamtlai phu pawl nih May 17 ah Tonzang khua um SAC ralkap pawl an kah hna i zarhkhat a rauh hnu ah khua an lak khawh tiah theih a si. SAC ralkap 40 leng zong a nung in an tlaih hna i hriam zuun 100 leng zong an rak lak khawh.

Tonzang khua ah mipi pawl hnangam tein an um khawh nakhnga bomrap pawl an thianh cuahmah lio a si tiah a chim fawn.

CNA telh in Chin dothlennak phu pawl nih Tonzang, Rezua, Lailenpi, Rihkhawdar khua hna cu an lak khawh cang.

Khatlei ah Chin Brotherhood phu nih Kanpetlet peng, Cindwe khua an lak khawh ve.

About The Author

Na ruahning rak langhter ve.. (Leave a comment)