Chinletwa Sakhaan In A Zaam Mi Ralkap 100 Leng Myanmar Ram Ah An Rak Kuat Ṭhan Cang Hna
The Chinland Post | 2024 January 9 — AA ralkap nih Chin ramkulh, Paletwa peng um Chinletwa ralkap sakhaan an lak lio ah India ramchung ah a zaam mi ralkap 104 cu January 9 chun ah Aizawl khua Lengpui vanlawng tual in kawl ralkap vanlawng nih Myanmar ram lei ah an kuat cang hna tiah Zalen nih a langhter.
Ralkap le palek 200 deng nih ṭha tein hmunhma an khuarnak Chinletwa sakhaan cu AA le MDF nih January 2 ah tlamtling tein an lak khawh i cu sakhaan um ralkap pawl cu Mizoram lei ah an zaam hi a si.
Chinletwa sakhaan in a zaam mi ralkap pawl cu AA le MDF nih an dawi hna i January 5 zaanlei sml 5:00pm hrawng ah kahdohnak a chuak ṭhan, ralkap 6 hrawng an thih bantuk in 10 nak tlawn lo an tlaih hna.
Cubantuk in 2023 December 29 ah India-Myanmar ramri ah a um mi ralkap Point 377 sakhaan cu AA nih tlamtling tein an lak khawh i cu sakhaan um ralkap 151 zong Mizoram lei ah an zaam. Cu lio ralkap pawl zong India cozah nih 2024 January 2 ah Aizawl khua Lengpui vanlawng tual in kawl ralkap vanlawng nih Myanmar lei ah a ap hna.
About The Author
