Chinram Hluttaw Nih Vuanci Zungthar Chap Ding In An Fehter I Deputy Speaker Ah U Taih Thang An Thim

Tawk Tling Thang| 2019 June 27| June 27 ah tuahmi Chin ramkulh hluttaw caanhman tonpumhnak ah President nih cakuatmi Milutchuak le Minung Thazaang Hrampi vuanci zungthar chap ding in an fehter i Deputy Speaker ah U Taih Thang an thim tiah kan theih.

Hi kong he  pehtlai in Thantlang peng ramkulh hluttaw palai Pu Van Thawng nih, “Tu ni hluttaw caanhman tonpumhnak ah President nih cakuatmi Milutchuak le Minung Thazaang Hrampi Vuanci zung thar chap le chap lo ding biatung chuahpi a si i hluttaw nih zapi hnatlaknak he chap ding in kan fehter. Cun, MP U Aung Taan zaka Deputy Speaker thimnak zong kan  ngei. MP U Pyi Min nih hluttaw Deputy Speaker caah biatung a chuahpi i Kanpetlet in MP U Phwe Aa nih a dirkamh i hluttaw nih MP U Taih Thang cu Deputy Speaker ah kan fehter” tiah The Chinland Post ah a chim.

“Tuni meeting ah 2018-2019 budget ramkomh cozah nih an chapmi biatung zong an chuahpi i nihin ah cazin an kan pek. Kan zoh cio lai i thaizing ah hluttaw hnatlaknak in fehter a si te lai. Cun hin ah upadi fehter ding a hran pakhat an chuahpi. Cucu, Leitang Chuak A Hmemi le Kutzung Riantuannak lei upadi a si, hihi thaizing ah fehter a si te lai. Nihin cu mah vial lawng hi kan ceihmai khawhmi a si. Meeting hi thaizing ah kan peh than te lai. Vuanci hi zeitik ah dah a kan thimpi te lai, aa fiang rih lo” tiah a biapeh ah a chimchap.

Minister thar a tuan dingmi cu President sin ah min cazin chuahpi hnu ah hluttaw nih an fehter than te lai.

Hluttaw Deputy Speaker hlun U Aung Taan hi Mindat peng ramkulh hluttaw-1 in MP a tlingmi a si. Ningcanglo in rian a tuan ti ruang ah central NLD party nawlpeknak in hluttaw nih Deputy Speaker thutdan in an thumh. Nihin ah Deputy Speaker ah an thimmi U Taih Thang hi Mindat peng ramkulh hluttaw-2 in MP a rak tlingmi a si.

Milutchuak le Minung Thazaang Hrampi Vuanci zung thar hi Yangon le Sagaing ramthen hluttaw zong  nih chap ding in an fehter cang. Asinain Yakhine ramkulh hluttaw nihcun mee peknak he chap lo ding in biakhiahnak an tuah.

Nihin meeting ah Deputy Speaker hlun MP U Aung Taan cu damlo ruang ah khunh a laak i meeting a kai kho lo. MP dang paoh cu tlingte in an kai dih tiah kan theih.

Leave a Commnet

%d bloggers like this: