CNA Nih Bengali 4 An Tlaih Hna I Thantlang Thonginn Ah An Hren Hna
City Hunter| 2018 February 14| CNA (Chin National Army, CAN) nih February 6, Tipi hlei (Tio) ah Bengali minung pali an tlaih hna i atu hi Thantlang thonginn ah an pali ningte in an hren/thlak chung hna tiah kan theih.
Hi kong he pehtlai in Thantlang CNF Liaison office zung in tuanvo ngeitu Pu Ral Hnin nih, “February 6, zingka suimilam 3 ahkhan Tipi hlei an tan lio ah kan ralkap CNA nih Bengali minung 4 an tlaih hna. February 13 chun ah Thantlang palek zung ah an ap hna. Atu hi zeitindah palek zung nih chekhlatnak an tuah i zei dirhmun dah an phak ka hngal ti lo. Phunglut lo Bengali kan ram ah a lutmi hna hi tuanvo ngeitu cozah nih felfaite in an tawlrel le ningcangte in dantatnak an tuah hrimhrim hna a herh” tiah The Chinland Post ah a chim.
“CNF nih Bengali minung pali an tlaih hna i February 13, suimilam 2:00 ah Thantlang penguk palek zung ah an rak ap hna. Penguk zung nih kanmah palek sakhaan ah an kan ap than. Kanmah nih ahmuh tuah awk a that lo caah lah-wah-kah ah kan va ap than hna. Lah-wah-kah nih ramkulh sin ah atu hi zeitindah an tuah lai timi nawl an hal liopi hna a si. An pali ningte in Kawlram mi sinak tette zeihmanh an ngei lo” tiah Thantlang palek sakhan Doh Sakhanhmu Pu Thang Ci nih The Chinland Post ah a chim.
“Lah-wah-kah nih ahmuh an hun i kanmah Thantlang palek sakhaan ah a kan ap ahcun lah-wah-kah upadi poahmah 13 ning in taza kan cuai hna lai” tiah Pu Thang Ci nih a biapeh ah a chimchap.
Bengali minung 4 an tlaihmi hna cu nu pahnih le pa pahnih an si. Minung pahnih hi Rakhine ramkulh ah a ummi an si, a dang pahnih hi Mizoram, Aizawl ah a ummi an si. Minung pahnih hi kum 19 veve an si i a dang pahnih hi kum 18 veve an si.
India ram, Mizoram lei in a rak lutmi Bengali minung 4 cu Chin ramkulh Tedim peng, Mualbem khua pawng, January 31 zinglei suimilam 1:30 tluk ah palek nih an tlaih hna tiah theih a si.
India-Myanmar No.2 chawlehtharnak sakhaan Rihkhawdar in Sagaing ramthen Kalay lei ah cycle carry pahnih hlan in thlithup a rak lutmi kum 20 hrawng a simi Bengali nu pathum le pa pakhat cu Tedim peng, Mualbem le Leidawh khua kar ah kan tlaih hna tiah Falam palek zung in Ye-oh Win Hlaing nih a chim.
“Tedim peng, penguk bawi (auh-choh-zi-hmu) nih Falam peng palek zung thawng a kan thanh i kan kawl colh hna. Tu zingka suimilam 1:30 hrawng ah cycle carry a phortu minung pahnih telh in Bengali minung 4 kan tlaih hna” tiah Ye-oh Win Hlaing nihcun a chim.
About The Author
