Paih Thawng Uk Ling Thang; Ka Kawi Hakha Zatlang Paih Ah Naa Paih Awk A Si Ko
City Hunter| 2018 February 14| US paih thawng Uk Ling Thang nih Hakha ah tuahdingmi Chin Miphun Ni zatlang paih ah Rung Lian Ceu hi aa paih awk a si ko tiah Zatlang paih i paihter a duhnak kong cu a facebook cahmai ah a langhter.
“Ka kawi Rung Lian, Laitlang ah paih ruah ah na tlung i mah tluk mizapi nih zatlang ah i pai seh ti an in duh ahcun naa paih ding a si ko tiah kaan ruahpiak. Atu lio ah Laipa ah a thawng bik lai tiah ruahmi zong na si. Atu Laitlang i zatlang naa paih lo ahcun zeitik ah dah na paaih ti lai atu hi na caantha bik le na thawn lio bik zong a si kho men. Lai lei cu US bantuk in nikhat chung ah zatlang he zuamcawh he paih a si lai lo” tiah Uk Ling Thang nihcun a facebook cahmai a tial.
” US ahcun minung tampi tei khawhnak ding lam a ngei ti lo ti tluk a si. Cu a si caah tutan Laitlang a tlunmi hi a caan tha bik bak a si. World Champion taktak a sinak ding le minung tampi a tei khawhnak ding ah i pai hrimhrim seh ti ka duh. Cun, mizapi nih Zatlang ah i pai seh ti an duh tuk caah zatlang zong ah i pai sehlaw minung tampi a tei khawh hna lai” tiah The Chinland Post sin ah a chimchap.
USA- world champion a cotu Rung Lian Ceu cu Hakha a tlun hnu ah mizapi nih zuamcawh lawng ah si lo in Zatlang zong ah i pai seh. Zuamcawh paih i champion co cu thawn taktak a si lo, zatlang he zuamcawh he champion a co lawnglawng ah World Champion taktak cu a si kho lai tiah mi cheukhat nih Rung Lian Ceu Hakha a rak tlunnak le tutan Hakha i aa paih dingmi kong ah comment tampi an pek.
Lai hlum paih thawng cheukhat zong nih Rung Lian Ceu cu kan zuamcawh lai. Amah paih le tlaih cu kan i ngaih tuk tiah an chimphuan cio. Hakha paih champion pakhat nihcun kei cu zatlang he, club he zuamcawh he champion ka co, hihi champion co taktak cu a si tiah media sin ah a chim ve.
Mizapi cheukhat nih Rung Lian Ceu cu zatlang ahcun i pai hlah seh, Lai lei cu nekngeih in a tha a dih hlan lo paih an hmang a timi an um. Cu lio ahcun tutan paih ah World Champion Rung Lian Ceu hi champion a co lo sual ahcun world champion kan ti kho taktak hnga maw? USA lawng ah si lo in Hakha zong ah champion a co lawng ah World Champion timi min pek phu taktak a si lai tiah upa cheukhat nih facebook ah comment tampi an pek cio tiah kan theih.
Rung Lian Ceu hi USA ram nisunglawi ah voi 10 aa pai i voi 8 champion a co cangmi a si. Tutan Laitlang a rak tlawn hi Lailei ah a voikhatnak bik aa paih a si lai. Amah paih zoh le amah paih hi mizapi nih an duhmi le an i hngahhlang ngai ciomi a si.
Tukum, Hakha ah tuah dingmi Chin Miphun Ni paih cu February 19 chun in Zatlang paih an thawk lai. February 20 chun ah club paih le zuamcawh paih an peh than te lai tiah kan theih.
About The Author
