CNLD Party Zung Hunnak Le Signboard Tarnak Rian Thawk In Palai 50 Leng An I Cuh Lai

Tawk Tling Thang| 2019 July 17| Chin National League for Democracy (CNLD) party cu party register an ngah hnu July 26 thawk in Thlanglei Laitlang ah tlawn i party signboard le party zung hunnak tuah i a ralaimi thimnak ah palai minung 50 in 60 kar cuh an i tim tiah kan theih.

Hi kong he pehtlai in CNLD party General Secretary chungtel Salai Ceu Bik Thawng nih, “Party register kan ngah hnu in tuanvo ngeitu upa hna a hmasa bik ton biaruahnak kan ngei. Aralaimi July 23, Yangon ah CNLD central party zungpi signboard tarnak le hunnak kan tuah lai. Cun, July 26 in Thlanglei Laitlang ah central party upa hna kan tlawng lai i pengkip party zung hunnak, signboard tarnak le pengkip committee sernak tibantuk kan tuah lai” tiah The Chinland Post ah a chim.

“Thlanglei Laitlang a dih in Chaklei Laitlang zong pehzulh in kan tlawng  lai i Sagaing ramthen, Magway ramthen le Rakhine ramtheu peng cheukhat zong kan tlawng lai i party zung hunnak, signboard tarnak le committee sernak kan ngei lai. A ralaimi thimnak ah kan party in palai 50 in 60 kar cuh kan i tim. Tutan meeting ah central party in committee cio rian i phawtnak le tuanvo i peknak zong kan ngei kho” tiah a biapeh ah a chimchih.

Chin National League for Democracy (CNLD) party cu ramkomh thimnak commission zung nih 2019 July 11 ah register No.116 in phungningte in resgister a pek cang. Cu bantuk in party zulhphung le upadi ning in party thar a simi CNLD register a ngah ni July 11 ah CNDP (Chin National Democratic Party), CPP (Chin Progressive Party) le CLD (Chin League for Democracy) party pathum cu commission nih phungningte in party hrawh le hnon a si ve cang tiah  kan theih.

“Rampi thimnak a dih hnu ni 60 chung ah CNLD party conference kan tuah lai i cu tikah party hruaitu upa hna, CEC le riantuan caan (term) vialte a thar in kan tuah dih te lai. A taangmi kumkhat le cheu chung ahhin party Chairman le General Secretary rian hi thlaruk chung cio hrawng kan i chang lai” tiah Salai Ceu Bik Thawng nih a chim.

Atu lio CNLD party Chairman rian a tlaitu cu Pu Zo Zam a si i General Secretary cu Pu Shing Tun a si. Thlaruk chung hrawng an tuan hnu ah party chairman rian cu Pu No Thang Kap le General Secretary cu Salai Pi Pi nih an tuan ve te lai. Cu dih hnu ah Pu Ngai Sak (Chairman) le Salai Ceu Bik Thawng (GS) nih an tuan ve te lai tiah kan theih.

Chin ramkulh lawng ah thimfung palai hmunhma zapi 39 a um. Chinram chung pin ah Sagaing ramthen, Magway ramthen le Rakhine ramkulh cheukhat telh in palai hmun 50-60 kar hrawng CNLD party nih cuh an i timh hi a si tiah kan theih.

Na ruahning rak langhter ve.. (Leave a comment)

%d bloggers like this: