Pi Ngun Thluai Cin Nih Hakha Ah 3Star Hotel A Sak; Timit Ah Family Resort Tuah Rih Aa Tim
Salai CungCung|2019 July 16| Japan ram ah khuasa mi Pi Ngun Thluai Cin nih Hakha ah 3star hotel- inn dot 5 cu a tlawmbik ks. sing thong 15 leng dih in a sak liopi a si. Cu lawng si lo in Timit chuk zuannak Thantlang lam ah innchungkhar thawh i chuahnak dinhmun (family resort) tuahding, Kalay le Yangon ah hotel sak chap ding zong timhtuahnak a ngei tiah kan theih.
Hakha ah dot 5 in a sakmi 3Star hotel cu “Hotel Muna Lisa” tiah min sak a si lai. Hakha Khuathar, Tlanghrawn sang- Mitat zung pawng ah 3star hotel cu an sak.
“Atu hi 3star Muna Lisa hotel cu kan sak liopi a si i hmaikum ah dih ding in timhtuahnak ka ngei. Tu lio kaa tinhmi cu 3 star hotel dih in hmaikum lei ah Timi chuk zuannak ah innchungkhar thawh i chuahnak dinhmun (family resort) tuah than ka tim. Khika ah khin innchungkhar fa le he zalong tein lentecelhti khawhnak ding tuah kaa tim. Hi Family Resort tuahnak ding ah cozah sin ah ca ka pek cang i a tlamtlin ah cun hmaikum ah thawk khawh ka duh. Hi 3star Muna Lisa hotel cu hmaikum December thla hlan ah hunnak tuah ka timh” tiah Pi Ngun Thluai Cin nih The Chinland Post ah a chim.
“Kan Lairam thanchonak caah a herh bik ti ka ruahmi cu thanchonak hi a phunphun in a um i mino caah hin thancho hi a biapi bik a si ti ka ruah. Aho paoh nih mah le cawlcanghnak cio ah thazaang i pek thiam kan herh. Thancho hi a fawi mi te a si lo, cucaah biatak tein i zuam cio kan herh. Minung hi um sawh lawng in um ding si lo, man ngei tein le nunchan ngei tein um kan herh. Khuazei ram le khuazeika hmun kan kal zong ah kan i zuam le fel tein le tei kan mak ah cun hmunhma pakhat cu kan phan kho ko lai ti ka zumh” tiah a chim chap.
“Hmailei kaa timh mi cu Kalay ah hmun zong ka ngei i cu ah cun 3star hotel sak chap zong ka duh. Cun Yangon zatlang lam zong ah Laimi um kal khawhnak ding caah hotel nganpi pakhat zong sak ka du. Kum 5 asilole kum 6 chung ah thlakhat umnak, thlahnihnak um, thla 6 umnak tibantuk khin tuah khawh ding hi ka chunmang a si. Hakha ka dih hlan cu zei hmanh chim awk a tha rih lo. Tu hi Japan ah keimah pumpak in restaurant zong ka tuah i Laimi riantuantu minung pa 8 ka ngei hna. Hmailei ka chunmang pakhat cu Japan ah hin Guest house pakhat tuah kho ning ti ka duh” tiah Pi Ngun Thluai Cin nih a chim.
Hakha ah an sak liomi 3 Star hotel cu 2017 in rak thawk cang mi a si i 2020 ah dih ding in timh tuahnak an ngei. Atu hi midang nih sak lio he chimchih in Chin ramkulh khualipi Hakha ah 3Star hotel pahnih an sak liopi a si cang tiah kan theih.
Pi Ngun Thluai Cin Ishikawa Co.,Ltd nih Chin ramkulh Paletwa ralzaam hna caah tangka Kyats Sing 103 bawmhnak a pekmi cu July 15 ah Chin ramkulh cozah nih cohlannak an tuah tiah kan theih.
Pi Ngun Thluai Cin cu a chuahnak Thantlang peng Vomkua khuami a si i Japan ram ah a chungkhar he khuasa mi an si. A fa hi Japan mi Shoji.Ishikawa a si i a fale nu pahnih- Munu le Lisa an si. Anih hi unau pa 6 lakah a hniangbik chang a si tiah kan theih.
About The Author
