Cozah Nih Thantlang Peng Khua 35 Cu Ks. Sing 100 Cio Bawmhnak An Pek Cang Hna
Salai Elvis| 2018 January 30| Cozah nih bawmhnak pekmi, khuate thanchonak zung nih tawlrelpiak mi Thantlang peng, khuakhat ks. sing 100 cio bawmhnak cu January 28, Thantlang, Town Hall ah khuate khuabawi sinah pekchanhnak an ngei cang tiah thawng kan theih.
Hi bawmhmi pekchanhnak ah Chin ramkulh Chief Minister Salai Lian Luai, Hluttaw Speaker Pu Zo Bawi, Lamsul lei Minister Pu Sui Thio, Minister Pau Lun Min Thang , Upadi bawizik Pu Sonny Thang Cung le Thantlang peng hluttaw palai Dr. Hmuh Thang nih pekchanhnak an tuah. Tukum chungah khua 35 lawng pek chung an si rih i a tangmi khua zong a rauhhlan ah an pek chom hna lai tiah theih a si.
Atu bantuk in bawmhnak pekchung mi hna khua cu; Tlangkhua, Tikhuangtum, Lungzarh, Sihcaang, Vanzang, Farrawn, Lungler, Thangzang, Fungkah, Bungtlang (khuathar), Thau (khuathar), Hriangkhan, Thlualam, Vambai, Salen, Tikir (A)+(B), Hmawngtlang, Leitak (B), Congthia, Phaikhua, Tisen (B), Fanthen, Lungcawipi (B), Khuabung (B), Hlamphei, Zephai (A)+(B), Vuangtu, Tluangram (A), Sacek, Hriphi (B), Zaabung, le Tlangrua (A)+(B) a zapi khua 35 an si.
Hi bawmhnak an pekmi hna cu thial lengmang mi lo tuahnak in a hmunmi dumhau tuahnak caah a bik in bawmhmi a si. Asinain zungah ca an chiahning cio ah cun khua 35 chungah a hmunmi dumhau tuah ding pakhat hmanh aa tel lo. Abik in khuakip cio nih an duhmi cu Cozah riantuantu hna umnak inn, Hall, Tikhawnnak, Luti luannak le a dangdang tuahnak ca deuh ah khua 35 nih an hal tiah theih a si.
Mah bawmhnak tangka zong January 29 ah an chuahpiak colh cang hna i rian zong an thok colh hna lai. Ks. sing 100 bawmhnak an pekmi hna cu an tuahtak maw? An tlamtlinh (aung-min) maw timi zong cozah lei nih an zohfel than hna lai. Thantlang peng ah khua 87 a um tiah theih a si. +++
About The Author
