Electric Mei Caantling Pek Khawh Ding Caan Chim Khawh A Si Rih Lo
Salai CungCung|2019 May 29| Ti a zor tuk caah kawlram pumpi electric mei pek cu caankarlak tete in pek a si. Hi mei pek ning cu tuan deuh bantuk in caantling tein pek khawh ding caan cu kan chim kho rih lo tiah Kalay pengkomh electric Engineer pakhat nih a chim.
“Tuan deuh ah cun Kalay hi suimilam 24 chung in kan pek. Tu cu ram pumpi caah mei laknak Ti a zor tuk caah mei hi caankarlak in kan pek hna. Ruah tampi in a vun sur than ah cun caantling tein pek than khawh a si te ko lai, zeitik a si te lai cu a fiang rih lo” tiah a chim.
Tubatuk in electric mei thazaang a der caah Kalay khuachung ah group 4 then in mei cu group pakhat ah suimilam 4 dan in pek an si tiah kan theih.
Kalay cu Tikhor cawhmi a zor dih i Ti an har pin ah tubantuk in electric mei zong caantling tein an hmuh khawh lo caah nifatin Ti le Mei harnak kan tong tiah Kalay khuachung ummi pakhat nih a chim.
“Tu kanmah umnak lei sang ah cun kum 50 leng chung ah a fak bik mi Ti harnak kan ton a si. Ni khua caan nih le fak ngai in a linh caan a si i um awk theih lo in a lin. Cu ah cun mei nih le caan karlak in a rat tikah harnak tampi kan tong. Mei zong a rat caan ah mei thazaang hi 90 in 100 kar lawng a si caah zei hmanh tuah a ngah lo” tiah Kalay Tahan sang ummi pakhat nih a chim.
Ref: Khonumthung
About The Author
