Na Tuh Bang Na Zuun Lai Timi Muicawl Thlak Cu Cheuthum Cheukhat An Dih Cang
Salai CungCung|2019 May 23| Hakha ah Na Tuh Bang Na Zuun lai timi muicawl cu May 15 in an thawk i cheuthum chung ah cheukhat cu an lim cang. Hi Na Tuh Bang Na Zuun lai timi cu M3 Multi Media (Phyo Wai Thein) tawlrelnak an thawk i Director ah Maung Muang Myint Lwin (Photo) le Script ah Pa Pui (The Hakha Post Chief Editor) an si tiah kan theih.
“Kanmah lei nih sawm in kan tuah mi a si lo, anmah nih Chin muicawl thlak kan duh an ti caah kan bawmh ve mi a si” Chin muicawl thlak khawh ve nak ding le Chin miphun nih muicawl pawl kan ngeih khawh ve nak ding, kan ram pumpi level in muicawl lei ah Chin mino pawl nih karhlan khawh ve nak ding ah zeital kan tuah kho ve hnga maw ti ka ruah caah tubantuk in ka tuah hi a si tiah” M3 Multi Media {Phyo Wai Thein) a ti. Cucaah kan mah pawl cu rian bawmtu ding ah a kan sawm caah kan bawmh ve mi a si. Cozah lei tha tein nawl a hal dih hnu ah a tuah mi a si” tiah hi muicawl Script lei tuanvo ngeitu Pa Pui nih TCP ah a chim.
Tutan muicawl an i thlakmi cu Na Tuh Bang Na Zunn lai ti a si. Hi muicawl Script cu kawlca in director pa nih a rak ngeih cia mi a si. Cu script chung chim ding mi le tuah ding mi pawl cu kan mah Lai Miphun le Lai holh he aa tlak ning in tuah ding ah Pa Puai @Lalawmpuia nih a tawlrel piak hna. Hi muicawl chung ah aa tel mi pawl cu Chinmi lawng an si.
“Lemcang hi minung tam ngai kan auh hna, a ruang cu hmailei caah cawnnak ah hmang hna seh ti ka duh caah a si. Fidi le Fitlaw an tam khawh deuhnak ding in script hi kan tuah. Tutan kan i thlak mi muicawl hi flim pakhat lawng si lo in flim 6 tluk a sau mi (a peh peh in um mi) khi kan i thla. Kan i thlaknak hmun cu a biapi in Hakha deuh a si. Na Tuh Bang Na Zuun lai timi a konglam cu mipi caah fimchim kho hna seh ti kan duh mi cu, tuchan a bik in nu pawl ramdang ah na kal lai i rian kan kawl piak lai tiin an auh mi hna ramdang an va phak tikah riantuan lo in an va zuar mi pawl hna, inn chungkhar pakhat a rummi nih an sin um pa an hnihsawh tuk mi kha hmailei ah anmah chungkhar nih an tuar, mipakhat nih thil tha lo a tuah tikah thil tha lo kan cung a tlung ve timi kan tuh bantuk in kan zuun tibantuk kongkau khi a si” tiah Pa Pui nih a chim.
“Hi muicawl rian cu Laimi nih kan chambau ngai mi a si. Miphun dang nih an ngeih dih i an tlinh pah dih nain kan mah Chin miphun nih kan tlinh kho deuh rih lo. Mino hna caah, kan Laimi nih hi bantuk hi a biapi in kan chia lo, kan chunmang ah kan manh bal lo, hi muicawl lei cu mino nuhrin thiamnak a ngeimi pawl nih cun biatak tein kal pi kho u sih law, cun Chin cozah zong nih hi pawl caah sianginn hna ah kan tuahpiak kho hna seh law ti ka duh. Cun hmailei ah cun kan mino chung in biatak tein a duh mi le aa zuam mi nih kar an hlan ah a tha. Tutan zong kan harbiknak cu hi bantuk muicawl lei an rak um lo tikah tu hi an voikhat a si caah tampi harnak kan ngei. Tutan tha tein kan tuah khawh hnu cun hmailei ah cun kan i fawih deuh cang lai. Cun atu a kan tawlrel piak tu le kan Director pa zong nih tampi thlak an duh rih” tiah a chim chap.
“Mino pawl nih lemcang lei an duh le an zuam i kar ka hlang ve lai an ti ah cun pakhatnak ah an duhnak le an thinlung zapi an pek hau. Cheukhat cu minthannak le larnak sawhsawh men ah ruah in an tuah ah cun a tha lo tak mi a si. Thinlung biatak tein a zuam lo mi hna nih cun an luh lo ah a tha. Biatak tein a zuam mi le a duh mi caah cun zeibantuk harnak hmanh um seh law an caah lam tha tampi a um. Tutan muicawl ah harnak kan ngei mi pawl cu a kan tawlrel piak tu hna hi kawlram minthang Fidi le Fitlaw hmanh an duh paoh in a rak sik hna le a rak tuah ciami an si caah tutan kan mino hna lemcang nak ah mah ti hin um, ma ti hin tuah ti in duhtawk in an ti mi hna kha kan nih Laimi cu sik kha kan celh lo. Cu tikah an lungdong, an tha a chia. Cucaah thinlung tak in zuamnak le duhnak ngeih lo ah cun hi pawl hi in a har ngai cang. Cheukhat zuamnak le duhnak a ngei mi pawl cu kan kal pi khawh ngai ko hna nain a cheukhat cu tu hi an lung zong a dong ngai. Hi lemcang tuahnak ah hin Hakha khuachung ah zeihmanh hnahnawhnak le donhkhannak kan ngei lo. Cozah sin ah tha tein ca pek hnu in tuahmi a si caah zei paoh kan tlamtling ko. A bik in mi inn le lo ah caan saupi kan hmanpiak tik hna ah an hmai cu kan khap lo ngai hna. Inn ngeitu cung zong ah kan i lawm. A taang rihmi zong ah hman ding tampi a um rih caah lungsau tein kan bawm hram ko u law ti zong mipi sin chim ka duh” tiah Pa Pui nih a chim.
Hi muicawl ah Fidi (actress) ah a biapi deuh in a tuanmi hna cu Matupi in Margaret, Tahan Mizo in Regina, Tedim in Monica, Hakha in Hniang Hlei Sung le Hakha in minung tam ngai an i tel kho. Fitlaw (actor) cu US in KL David le a bawmtu pawl ah Min Cung Sang, Bawi Hrin Mang le a dang dang tam ngaite an i tel kho tiah kan theih.
About The Author
