Falam Peng Ah CDF-Thantlang Hriamtlai 1 Nih Meithal In Hngakchia A Kah
The Chinland Post | 2023 September 15 — Chin ramkulh, Falam peng, Haimual khuate ah kum 14 hngakchia Salai Ro Pek Hlu cu September 13 ah CDF-Thantlang hriamtlai 1 nih meithal in a kah i a kehlei khuk aa hliam tiah Zalen nih a langhter.
CDF-Thantlang hriam cheukhat cu September 13 chun ah zuu an ding i Falam peng Ngaihlan le Zongte khua karlak ah meithal an puah. Zaanlei sang ah Haimual khuate ah an lut i meithal an puah an puah ṭhan. An lak i pakhat nih tikhor pawng ah a um mi Salai Ro Pek Hlu cu kha ke ṭawlnak caah hrai a hal lio ah meithal in a kah i a kehlei khuk a pem i aa hliam tiah Zalen nih a langhter.
Cu ni zaan ah aa hliam mi hngakchia cu CNA Headquarters ah an kalpi i an thlop hnu September 14 zinglei ah Operation an tuah. CDF-Thantlang Khualhring tlang sakhaan bawicem nih aa hliam mi chungkhar hna cu an va len hna i nawlnak an tuah hnu ah sii man sing 10 an pek hna.
“Haimual khuabawi nih “Meithal in a kaptu hi kum 25 hrawng a si lai. Commando cawnnak a dih cang mi a si. Sakhaan bawicem nih cun ralkap phung ning tein dan kan tat lai tiah a chim. CNO upa pawl zong an ra ve i sualnak a buar mi pa kha a herh ning in dantatnak kan tuah lai tiah an chim ve. Kan umnak khua le CNA Headquarters hi cycle in sml 1 hrawng kal a si. A hlan ahcun atu bantuk buainak hi kan tong bal lo nain hnahnawhnak a tam ngai” tiah Zalen ah a chim.
Hliam a tuar mi chungkhar hi lotho in aa cawm mi chungkhar an si.
2021 October 3 zong ah Falam peng, Thichap khuate ah CNA ralkap pakhat nih meithal zuun 7 a thlah i kum upa nu pakhat aa rak hliam bel cang.
About The Author
