Falam Peng Chung Ah CNF/CNA Gate le Sakhaan Tuah Ti Lo Ding Tiah CNO/CNDF Nih A Hal
The Chinland Post | 2023 August 22 — Chin ramkulh, Falam peng chung ah a um mi CNF/CNA sakhaan le gate pawl hrawk dih ṭhan uh tiah CNO/CNDF nih August 19 ah CNF Chairman sin ah ca an pek.
CNO/CNDF hmunhma a si mi Falam khuachung ah CNA le ṭangrual phu pawl nih August 12 ah CNO/CNDF theihternak um lo in kahdohnak an tuah hnu ah atu bantuk in halnak ca an pek hi a si.
CNO/CNDF biachimnak nawl a ngeitu Salai Peter Thang nih cun “kanmah le kanmah miphun karlak ah remlonak a chuahnak hnga hriam pek, raltuk cawnnak pek, mah pumpak in sakhaan ah thazang chapnak pawl hna ahlan tein a um cang. Kan hmunhma chung ah sakhaan an sak mi zong a um. Kanmah hmunhma chung ah ngunkhuai an kholh mi zong a um. Naite zong ah khuachung tiang kahdohnak an rak tuah lio ah khat le khat biaruahnak le theihternak zong a um lo. Cun zeiruang ah an tuah ti mi a ruang fianhnak zong chim a um lo. Mah pakhat lawng a si lo. Adang a ruang tampi zong a um cang caah hi kong hi tawlrel a hauh cang caah a si” tiah Khonumthung Burmese ah a chim.
CNF/CNA Chairman sin an pek mi ca chung ah CNA le CNO/CNDF karlak ah a herh lo mi buainak kan hrial khawh nak hnga Falam peng chung ah hmunhma a khuar mi CNA sakhaan le gate pawl a rannak in hrawk uh tiah an hal.
Falam peng chung ah CNA gate 3/4 a um tiah CNO/CNDF sin in theih a si. Cu sakhaan le gate pawl cu CNDF dirh a si hnu ah kahdohnak he pehtlai in a biapi mi hmunhma pawl an si lo, a biapi mi hmunhma pawl ahcun CNO/CNDF nih sakhaan a sak ding kha a si ko caah nawl kan rak awnh hna hi a si.
Asinain atulio kahdohnak pawl ah ahlan kan in kaphnih karlak theihternak, biaruahnak pawl tuah ding a si mi kha CNF/CNA nih hmunhma a ngeitu CO/CNDF kha biaruahnak le theihternak zong an tuah lo tiah Salai Peter Thang nih a chim.
“Hmunhma a ngeitu nih voi tampi biaruahnak kan tuah lengmang ko hna nain zeihmanh an chim lo leng ah kahdohnak an tuah lio ah a fiang mi a ruang zong chim a um lo i Chin ramkulh hi kanmah ta, kan duh mi poah kan tuah lai ti mi dirhmun a lawh caah kanmah lei nih cun ralkap pawl siseh, mipi siseh an thin a hun tuk caah hmailei caan ah hi bantuk dirhmun a um ti lo nak hnga Falam peng chung ah a um mi CNF/CNA le CNO/CNDF bawm in kahdoh tuahṭinak pawl kan dinhter chung lai i kaphnih hnatlaknak in lungrual tein a phi pakhat kan chuah khawh hnu lawng ah rian kan ṭuanṭi ah a ṭha lai. Cuti a si lo ahcun hi hmunhma chung ah kapkhat le kapkhat kan i ton tik ah i remlonak pawl kan tawlrel khawh hlan ah buainak a chuah sual nak hnga lo ti mi ruahchannak he kan hal hna hi a si” tiah Salai Peter Thang nih a chim.
CNF/CNA nih Falam peng chung ah kahdohnak an tuah ding a si ahcun ahlan kan tein biaruahnak kan ngei hna lai tiah CNF Chairman nih ahlan tonnak pawl ah biakamnak an kan pek tiah a chim fawn.
CNO/CNDF nih an hal mi a tlin khawh nak hnga a dotdot in an kal lai i a dot khatnak ah kaphnih karlak biaruahnak kan tuah lai, a dot hnihnak ah CJDC phunglam ning tein kan tuah lai, a dot thumnak ah adang peng pawl he bia kan i ruah lai, cubantuk zong in kan hal mi kan ngah lo ahcun kahdohnak lam thim a si te lai” tiah Salai Peter Thang nih cun a chim fawn.
2021 pau dothlennak aa thawk lio ah Chin ramkulh chung kahdohnak dirhmun hi CNA nih a tlamtlinh khawh lo caah Falam peng chung Chin miphun hna le Falam chaklei ah a ṭhudir mi Chin mipun hna fonh in CNDF cu 2021 April ah dirh a si i kahdohnak voi 130 leng a tuah cang tiah CNO/CNDF nih a thanh.
About The Author
