Gangaw ah zarhkhat chungah mipi inn 50 an khangh i khuami 2 an tlaih hna
The Chinland Post | 2022 September 15 – Magway ramṭhen, Gangaw peng khuate 4 cu September 8 in September 13 tiang SAC ralkap pawl nih an khangh caah mipi inn 50 deng le cycle 50 hrawng a kaang i khuami 2 zong an tlaih hna tiah theih a si.
Gangaw Hrambunh Infantry 50 le Kalay hrambunh Infantry 55 phuhnih in SAC ralkap 200 leng hrawng Minza, Lapu, Zuasi, Saidu khuate hna ah an lut.
Gangaw khua thlanglei meng 8 aa hlatnak Minza khua cu September 8 zaanlei ah SAC ralkap pawl nih cycle 2 an khangh khuami 6 an tlaih hna i pakhat an thlah ṭhan tiah khuami pakhat nih RFA ah a chim.
Cu SAC ralkap pawl nih September 10 zinglei sml 7:00am hrawngah inn 850 hrawng khua an saknak Lapu khua ah an lut ṭhan i inn 15 le cycle 40 leng an khangh tiah theih a si.
Lapu khua ah an tlaihmi minung 4 belte cu an thlah ṭhan hna tiah theih a si.
Cu ni thok in Gangaw he meng 3 aa hlatnak Zuasi khua cu September 11 chun sml 2 hrawngah an lut ṭhan i mipi inn 15 le cycle 40 leng an khangh tiah khuami nih RFA ah an chim.
SAC ralkap pawl cu September 12 ah Gangaw khua pawng inn 400 leng an umnak Saidu ah meithal an puah i mipi thil tampi, Sui 5 shekal le tangka sing 7 an lak, mino 21 an tlaih hna i 20 an thlah ṭhan hna hnu September 13 ah an chuak ṭhan.
An tlaihmi hna Minza khuami pakhat le Saudu khuami pakhat cu Gangaw hrambunh Infantry 50 ah an kalpi hna i zeiruangdah an tlaih hna ti cu a fiang in theih a si lo tiah RFA nih a ṭial.
About The Author
