Gangaw peng ah kahdohnak voi 8 a chuak i SAC ralkap 10 an thi, PDF 4 an i hliam

The Chinland Post | 2022 September 2 – Sagaing ramṭhen, Kalay peng in Magway ramṭhen Gangaw peng ah a lutmi SAC ralkap le mipi hriamtlai phu hna karlak ah kahdohnak voi 8 a chuak i ralkap 10 nak tlawm lo thi, tampi an i hliam tiah theih a si.

August 18 thok in thazang 150 hrawng a simi Infantry 55 cu Kalay-Gangaw lam in an raa i Gangaw peng khuate hna ah an lut.

Cu SAC ralkap pawl cu Gangaw-Kalay ramri Hantharwady khua in an rak chuak i Hnankhar khua an tan lioah timhcia tein a rak hngakmi mipi hriamtlai phu nih an kah hna i kahdohnak aa thok.

Cu ni kahdohnak cu sml 3 hrawng a rau i Taungkhinyan sakhaan nih 120 MM nih kah an bawmh hna caah mipi hriamtlai phu pawl an kir ṭhan.

SAC ralkap pawl cu Hnankhar khua ramlak ah an lut i ralzaam mipi hna thlam, chi, facang le eidin pawl an khanghpiak hna.

August 22 ah ah Moiklay khua, August 24 ah Kanme tiva pawng, August 25 ah Thaehlaw khua, August 27 ah Tinlaykone, August 28 ah Mauklin khua le August 29 ah Kyaw khua hna ah kahdohnak a chuak.

Cu hmunhma pawl kahdohnak chungah SAC ralkap 10 nak tlawm lo an thi i mipi hriamtlai 4 fak tuk loin an i hliam tiah Gangaw PDF cathanh ah a langhter.

Thlacheu leng kahdohnak a tuahmi SAC ralkap pawl cu August 31 ah Gangaw in an chuak i Ṭinlin lei ah an kal tiah theih a si.

Tutan kahdohnak chungah Hnankhar, Htayhlaw, Moiklay, Tinlaykone, Mauklin, Kyaw le a pawngkam khuami 10,000 leng an zaam tiah theih a si.

Na ruahning rak langhter ve.. (Leave a comment)

%d bloggers like this: