Hakah Ah Cycle Khawndennak In Mi Pahnih An Thi Colh I Minung Pahnih Sii-inn An Phan

0

City Hunter| 2018 March 25| Hakha, Khuathar sang, zanhnih chung ah motor cycle i khawndennak in minung pahnih a hmun ah an thi colh veve i an hawile pahnih zong fak ngai in an i khawnden caah sii-inn an phan veve tiah thawng kan theih.

March 24 zan, Hakha Khuathar, Htun Tauk kunza dawr hmai i a dir liomi motor cu pa pahnih nih motor cycle in an pah sual caah minung pakhat cu a hmun ah a thi colh. A hawi pakhat cu a thluak ah thi a luh caah Mandalay sii-inn ah an lanhpi. Cu bantuk in March 25 zan thiamthiam ah Hakha Khuathar, Thantlang lampial ah motor a dirmi kha minung pahnih aa phirhmi cycle nih an va pah sual caah pakhat cu a hmun ah a thi colh ve i a dang pakhat cu Hakha sii-inn pi ah an tlikpi colh tiah kan theih.

March 24 zan thil cang ah Cycle aa citmi hi Lungzarh khuami Pa Vel Ram Bik (kum 18) le pa Lian Uk Cung (kum 20) an si. March 24 zan suimilam 8:25 ah tlangval pahnih nih cun Hakha Khuathar sang Htun Tauk kunza dawr hmai i a dir liomi motor 3J/5712 Nissan UD cu an va pah. Motor a mongtu hi Myat Lin (kum 25) a si.

Motor cycle mongtu pa Vel Ram Bik cu a lu hnulei hmun hnih ah hliamhma a tuar. Cun, a hnakhaw pahnih hmunthum in thi a chuak i sii-inn an kalpi manh hlan a hmun ah a thi.

Motor cycle hnulei ah aa pherhmi pa Lian Uk Cung zong a tukbakhur a pem, a hnar in thi a chuak, a kenglei ah fak nawn in aa khawn chap rih caah Hakha sii-inn ah an kalpi. Hakha sii-inn nih pa Lian Uk Cung cu a thluak ah thi a lut an ti caah Mandalay sii-inn ah an lanpi tiah theih a si.

Zuu rit bu he daithlang in motor cycle a mongtu pa Vel Ram Bik cu PK ye-oh Ko Ko Maung nih palek sakhaan ah ahmuh (case) a on. Motor cycle khawndennak 10/2018 le mithah lainawnnak (ya-za-tat-gyi) pohmah 304-A/388 ning in March 24 zan, sml. 11:30 ah ahmuh an on i cu hnu ah chekhlatinak an tuah tiah Hakha palek zung in kan theih.

“March 25 zan ah aa hliamkhuaimi hi Hakha peng Hrawngvun khuami Pu Zung Khar fapa Tial Cung Uk le Malsawm khuami Tluang Lian Thang fanu Dawt Hnem an si. Tial Cung Uk nih cycle hi a mongh i anih cu a hmun ah a thi colh. Amah hi tukum tanghra a phimi le Hakhathar ah a ummi an si. A cal a dep, a lu a kuai, a mitmu tiang kuai dawh a si. Cun, a phirhmi a hawinu zong hi fak ngai in aa khawn caah a lungfim lo bu in Hakha sii-inn ah an kalpi colh ve. Tial Cung Uk ruak cu Hakhathar No.1 sang ah a ruak an suan” tiah Hakha Khuathar khuabawipa Pu Ram Lian nih The Chinland Post ah a chim.

“An i khawnden hi March 25 zan suimilam 9:30 hrawng ah a si. Lamkam ah a dirmi motor zong hi a palh pah ve. Platform he pe 5 aa hlatnak lam laifang deuh ah a dir. Cycle aa phirhmi hna pahnih hi rang deuh in mong hna sehlaw, an hmailei ah a rami motor an kianhnak ah atu bantuk in motor a dirmi an pah hi a si. Cycle aa citmi cu motor pawng ah an va i hlonh. An cycle tu cu motor tang ah a va lut i cycle lu cu a sawp dih” tiah khuabawipa nih a biapeh ah a chimchap.

Biakilh: Hliamkhuainak an tonmi hmanthlak hi tih a nun tuk caah a dang cu kan hun langhter ti lo. A cung i pakhat kan tarmi khi tih a nun deuh lonak hliamkhuai a tuarmi minung, cycle le motor an si.

About The Author

Na ruahning rak langhter ve.. (Leave a comment)

%d bloggers like this: