US Um Pu Cung Sang Uk Nih Thangzang Khua Ah Zaukphung Lei Cawnnak A Tuahpi Hna
The Chinland Post| 2018 March 25| Thantlang peng Zahnaktlang, Thangzang khuami US um Pu Cung San Uk te chungkhar nih March 24-25 nihnih chung, zaukphung cozah hruainak ah mizapi covo le tuanvo kong siseh hmailei khua thanchonak kong he pehtlai in cawnnak an tuahpiak hna.
Hi kong he pehtlai in Thangzang Khuathar Baptist Church pastor Uk Bawi Thang nih “Hi bantuk in hmundang le ramdang ah a um cangmi kan unau nih khua siaherhnak thinlung he an ngeihchiah chawva dih in cawnpiaktu an kan sawmpiakmi cungah upatnak kan pek hna i kan lung aa lawm tuk. Keimah ka hngalh tawk ah hi bantuk vawlei lei in thanchonak le ram hruainak, uknak lei kong tibantuk hi cawnnak kan ngeih a hmasa bik a si ko rua. Bawmchantu chungkhar duhpiaknak hrim zong hi Pathian nih thluachuah a pek lai i kan caah a thahnem hrimhrim lai ti ruahchannak ka ngei” tiah a chim.
Tutan cawnpiaktu ah an sawmmi hi The Chinland Post ah Editor in Charge tuan liomi Salai Ngun San Aung a si i a tlangpi in a cawnpiakmi hna cu Ram hruainak, sersiamnak ah mizapi hna kan tuanvo le kan miphun ral a si mi Kawl dawpdolhnak kan hmuh thiam i miphun dawtnak le lungrualnak kan ngeih khawh nakhnga Myanmar ramkhel umkal ning le tuanbia hna an si tiah cawnpiaktu nih a chim.
Thangzang khua cu Khuahlun, Khuathar in an i then i khuathar ah inn 80 le khuahlun 20 an um. Tutan cawnpiaknak ah an khuahnih tein an i tel kho. Cawnnak a ngaimi 70 tluk an si tiah kan theih.+++
About The Author
