Hakha Ah Motor Dinhnak Hmuhhnih Tuah An Thawk Cang

Salai Ngun San Aung| 2018 January 17| Hakha caah motor dinhnak hmun cu pathum tuah an timh i tu hi pahnih tuan an thawk cang, pakhat bel tender an auh lio a si tiah kan theih.

“Kankaw lam lei hi sing 400 in Ely Par Company nih an i tlaih. Rian an thawk cang. Falam lam lei hi Ciriang company nih sing 200 in an i tlaih ve. Ruavazung kha sing 300 in tender kan auh lio a si, aho nih an tuan lai a fiang rih lo. Tlawmpal cun tuan colh a si ve ko lai” tiah Chin ramkulh Sipin Director Pu Thla Hre nih a chim.

Hakha caah motor dinhnak pathum ngeih hi a herh maw, kan motor lutchuak tlawmtam he aa buaktlak maw timi biahalnak hi zapi sin in siseh motor le car gate lei tuanvo ngei upa sin in a chuak ngai mi a si. Hakha ah motor gate tuanvo ngeitu upa pakhat nih tuan deuh lio ah hitihin a chim bal.

“Hakha ahhin Bus Terminal tampi ngeihnak in a thami te pakhat ngeih kan herh deuh. Cubantuk ca ah cun Ruavazung hi a tha bik. Car gate pakhat hmanh ah gate riantuantu pahnih hrawng leng kan chia kho hna lo. Inn khan man a si rih. Cucaah Bus Terminal hi hmun hnihthum ah an kan tuahpiak ahcun kannih lei cu kanmah duhnak hmun ah gate kan tuah a hau ko hnga. Hmun hnihthum ning in cun gate kan hung kho lai lo. Cun tangka sing 400 hi Bus Terminal tuahnak caah a tlawm tuk. Zei ngaingai a tuan kho lai lo. A tlawmbik sing thong khat tal a herh.”

Hi kong he pehtlai in Sipin Director Pu Thla Hre nih, “Bus Terminal hi lam le a hmun lawng Cozah nih kan chunh lai. A inn le thilri chiahnak inn tibantuk pawl cu anmah motor le gate pawl he kan i ceih than te lai. Cun thil phor motor vialte hi cu ka ah cun riahter an si cang lai. An thil chiahnak inn ngan pipi (War house) an um lai i cuka ah cun thil an thumh lai. Cu hnu lawngah dawr ngei pawl nih an thil an lak lai. Cun minung citmi motor pawl zong an si rih lai caah hmun tam pi kan herh ko” tiah a chim ve.

“Hakha ah Bus Terminal tha tein kan ngeih ahcun khua chung ah motor ngan an riak ti lai lo i kan lam hi zalong deuh in chawhvah khawh a si cang lai. Cun motor le cycle tibantuk khawndennak zong a zor deuh lai tiah zumh a si. Cu hnu ah hibantuk in motor ngan nih thilri chiahnak inn ah an thumhmi thilri khuachung tiang thiar nak kha khuami caah rian aa chap lai i rian ngei lo harnak a zorter lai. Thil man a kai lai maw timi ruah awk a um nain thilman zong cu fangkhat hnih leng a kai lai lo. Khatlei ah rian a chuahpi ve lai caah aa buaktlak ko lai” tiah Pu Thla Hre nih cun a hmuhning a chimchap.

Hakha ah Bus Terminal tuah ding timi hi a hmunhma kong ah duhnak aa rak dan pah caah chikkhat kar rian zong rak dinhter a sinain tu cu upa te nih an zohmi a dihlak in ser cio an si lai tiah theih a si. +++

Leave a Commnet

%d bloggers like this: