Hakha Cu An Thilhal An I Fuh Ngai; Vice President Nih An Halmi Phun 7 Tuaktaanpiak Dih Ding In A Leh Hna

Salai Cung Cung| 2018 May 21| Hakha khuanu khuapa cu an thil halmi an i fuh ngaingai. Hakha ti harnak tawlrelnak ding caah Laiva dinti telh in thil phun 7 an halmi cu Vice President Pu Henry Van Thio nih kan zuampiak hna lai tiah a leh dih hna.

Laiva tiva cu Falam peng ah a ummi a si i Hakha khuanu khuapa nih voikhat laakding an rak timh cang nain Falam khuami nih an rak al bal hna ti thawng kan theih. Cuti an rak al hna cu Falam khuami theihter lo in cunglei nawl lawng in tuah rak i timh asi caah a tlamtlin lo nak hi a si. Atu cu Falam khuami he zong hnatlak a si cangnak le kaphnih lungtling tein an tah cang i Falam he Hakha he a pek khawh dingmi a sinak kong cu Hakha khuanu/khuapa Secretary Pu Hrang Vung nih The Chinland Post ah chim.

Hakha khuanu khuapa nih an halmi thil pa 7 cu Vice President nih kan ruahpiak hna lai ati. Cu thil pa 7 cu;

1. Hakha innhmun hi thla 6 chungah sak dih ding kan ti hna le thing cawk awk aum lo caah harnak tampi a um. Cucaah thing hi Gangaw lei an chiahmi seh kha Bungzung ah kan thialpiak u law thing cheu/ahnak zung hi Hakha ah kan chiahpiak u law kan ti i tawlrel le ruahpiak ding in Amen a kan pek (a kan cohlan). Amah zong nih a kir pah ah felfaite in a zoh pah cang.

2. Bungzung ah Ma-ha-dah-aa line zungthen chiah ding zong kan hal i a kan pek cang. Cun, Ma-ha-dat-aa line lam zulh ah a ummi Hakha peng khua pawl; Bungzung, Lei-um, Lungcawi, Lamtuk, Tinam, Ruavan, Zokhua, Nipi tibantuk 11KV in ma-ha-dat-aa line mei pek zong kan hal i kan in ruahpiak hna lai tiah a leh hna. Cu zong cu tuanvo ngeitu le amah zong nih zohfelnak a ngeih cang.

3. Timit ti zeicahdah tu tiang tha tein kan ngah rih lo, aran nakin kan tawlrelpiak hna seh tiah kan hal i cu zong cu kan in tawlrelpiak hna lai tiah a leh hna.

4. Laiva ti zong hi electric mei cu tluk in kan herh tuk ti lo caah Laiva ti hi dinti caah laak ding in kan halmi zong tawlrelpiak ding in a kan cohlan.

5. Hakha sii-innpi caah Specialist Doctor kan hal nain an kan pekmi hi Specialist Doctor si lo in AS pa 14 an kan pek. Asinain kan duhmi le kan herhmi cu Specialist Doctor a si caah ti tin specialist doctor kan hal i kan i zuam lai tiah ramkomh minister pumpak nih bia a kan kamh.

6. Hakhathar lam hi kat-ta-ya phah lo cun fur ah kal khawh asi lo caah a rannak in na kan phahpiak lai kan ti i cu zong cu tuahpiak colh ding ah lungtling te in a kan cohlan.

7. Hakha Science college hi 6 Billion in budget a tla ding a si i a cheu hrawng hi kan in tuahpiak hna a kan ti. Hi phun 7 kan halmi chungah hin tha tein kan in tuahpiak hna lai a kan ti dih tiah Hakha khuanu khuapa in Secretary Pu Hrang Vung nih The Chinland Post ah a chim.

Na ruahning rak langhter ve.. (Leave a comment)

%d bloggers like this: